ދެކުނު ފަރާތު ގޮނޑުދޮށް ހިމާޔާތްކުރުމުގެ މަޝްރޫއުގެ ދަށުން ހިލަ އަތުރަން ފަށައިފި

ކުޅުދުއްފުށީ ދެކުނު ފަރާތު ގޮނޑުދޮށް ހިމާރާތްކުރުމަށް ކުރިއަށްގެންދާ މަޝްރޫއުގެ ދަށުން އެސަރަހައްދު ބޭރު ފަރާތުގައި ހިލަ އަތުރަން ފަށައިފި އެވެ.

ކެޕިޓަލް އިންވެސްޓްމެންޓް އެންޑް ފިނޭންސް ޕްރައިވެޓް ލިމިޓެޑާ ހަވާލުކޮށްގެން ކުރިއަށްގެންދާ މިމަޝްރޫއު އަކީ 1 އަހަރުގެ ދުވަހުގެ ޕްރޮޖެކްޓެކެވެ. މި މަޝްރޫއު ފަށާފައިވަނީ މިއަހަރުގެ ޖެނުއަރީމަހުގެ ފަހުކޮޅު އެެވެ.

އެސަރަހައްދުގެ ގިރުން ހުއްޓުމުގެ ގޮތުން ބޭރު ތޮށިން ކުޑަ ތަންކޮޅެއް އެތެރެއަށް ވާގޮތަށް ވޯޓާ ބުރޭކަކާއެކު 710 މީޓަރުގެ ރިވެޓްމެންޓެއް ޖެހުމަށް ވަނީ ހަމަޖެހިފަ އެވެ.

މިމަޝްރޫއު ނިމިގެންދާއިރު އެ ސަރަހައްދުގައި ޖުމްލަ ތިން ވޯޓާ ބުރޭކެއް އިންނާނެ އެވެ. އެއީ 120 މީޓަރުގެ ވޯޓާ ބުރޭކަކާއި 140 މީޓަރުގެ ވޯޓާ ބުރޭކަކާއި ރިވެޓްމެންޓާ އެކު ޖެހުމަށް ހަމަޖެހިފައިވާ 450 މީޓަރުގެ ވޯޓާ ބުރޭކެކެވެ. ކޮންމެ ވޯޓާ ބުރޭގެ ގެ ދެމެދުގައި 18 މީޓާރާއި 20 މީޓަރުން ހުންނާނެ އެވެ.

މިމަޝްރޫއުގެ ދަށުން ސަރަހައްދީ ބަނދަރުގެ ދެކުނު ފަރާތުން ގޮނޑުދޮށުން ފެށިގެން އިންޖީނުގެއާ ދޭތެރޭގެ ގޮނޑުދޮށް ހިމާޔާތްކުރެވިގެންދާނެ އެވެ.

އަދި މީގެ އިތުރުން އެމަޝްރޫއުގެ ދަށުން އެތަނުގައި މޫދު އެރޭ ސަރަހައްދުގެ ގޮތުގައި 60 ފޫޓާއި 100 ފޫޓްގެ ސަހަރައްދެއް ހެދިގެންދާނެ އެވެ.