ބޮންޑު އިންޓަނޭޝަނަލް ލޭންގުއޭޖް ލާނިން ސެންޓަރުން ޔަތީމު ކުދިންނަށް ހިލޭ ކިޔަވައިދެނީ

ކުޅުދުއްފުށީގައި ހުންނަ ބޮންޑް އިންޓަނޭޝަނަލް ލާނިން ސެންޓަރުން ޔަތީމު ކުދިންނަށް ހިލޭ ކިޔަވައިދޭން ނިންމައިފިއެެވެ.

އުމުރުން 7 އަހަރާއި 12 އަހަރާއި ދެމެދުގެ ކުދިންނަށް ހާއްސަކޮށްގެން ބާއްވާ ކުލާސްތަކަށް ޖާގަ ދޫކުރުން މިހާރު ފަށާފައިވާއިރު އެ ސެންޓަރުން ޔަތީމު ކުދިންނަށް ހިންގާ މި ޕްރޮގުރާމުގައި އިންގިރޭސި ފެންވަރު ރަނގަޅުކޮށް އަމިއްލައަށް ވާހަކަ ދައްކަން ދަސްކޮދިނުމާއި ބައިނަލް އަގުވާމީ އިމްތިހާން ތަކުގައި ފާހަގަކުރެވޭ ކާމިޔާބީތައް ހޯދައިދިނުމުގައި އެހީތެރިވެދޭނެއެވެ.

ކުލުދުއްފުށި އޮންލައިނަށް މައުލޫމާތު ދެމުން އެ ސެންޓަރާ ހަވާލުވެ ހުންނެވި އަދާމް ޝަރީފް ވިދާޅުވީ މިހާރުވެސް އެ ސެންޓަރުގައި 10 ވަރަކަށް ޔަތީމު ކުދިންނަށް ކިޔަވަމުން ގެންދާ ކަމަަށާއި އިތުރު ކުދިން ނަންނޯޓް ކުރަމުންދާ ކަމަށް އާދަމް ޝަރީފް ފާހަގަ ކުރެއްވިއެވެ.

އާދަމް ޝަރީފް ވިދާޅުވީ ޔަތީމު ކުދިންނަށްވެސް ކިޔަވައިދެނީ ކެމްބްރިޖު އިންގްލިޝް ޔަންގު ލާނާސްގެ ޕްރޮގުރާމްގެ ދަށުން ކަމަށާއި ޕްރޮގުރާމްގެ ފީ އެހެންކުދިންނާ ހިލާފަށް ޔަތީމު ކުދިންގެ ކިޔެވުމަށް ދައްކަން ނުޖެހޭނެ ކަމަށެވެ.

އެސެންޓަރުން ހިންގާ ހުރިހާ ޕްރޮގުރާމުތަކެއްގައިވެސް ކިޔަވައިދޭން ހަމަޖެހިފައިވަނީ އިނގިރޭސި މައްދާ ކިޔަވައިދިނުމުގެ ރޮނގުން މާސްޓާސް ހަދާފައިވާ ސިރީލަންކާގެ ތަޖުރިބާ ހުރި ޓީޗަރުންނެވެ. އަދި ކޯހަށް ބޭނުންވާ ހުރިހާ ފޮތްތަކާއި ކެޔެވުމަށް ބޭނުންވާ ތަކެތި ސެންޓަރުގެ ފަރާތުން ކުދިންނަށް ހިލޭ ފޯރުކޮށްދެވިގެން ދާނެ ކަމަށްވެސް އެ ފަރާތުން ބުނެއެެވެ.

ބޮންޑު އިންޓަނޭޝަނަލް ލޭންގުއޭޖް ލާނިން ސެންޓަރުގައި އޭގެ އިތުރުން ބޮޑެތި މީހުންނަށާއި ސްކޫލްތަކުގައި ކިޔަވާ ދަރިވަރުންނަށް ހާއްސަކޮށްގެން ޕްރޮގުރާމްތަކެއް މިހާރުވެސް ކުރިޔަށް ގެންދެއެވެ. އެގޮތުން ޖީސީ އޯލެވެލް ހަދާ ކުދިންނަށް އިނގިރޭސި ދަސްކޮށްދިނުމާއި ގުރޭޑް އެކަކުން ފެށިގެން ފަހެއްގެ ދަރިވަރުންނަށް ހާއްސަކޮށްގެންވެސް ކުލާސްތައް އަންނަނީ ބާއްވަމުންނެެވެ. އަދި ބޮޑެތި މީހުންނަށް އިނގިރޭސި ބަސް ދަސްކޮށްދޭ ކުލާހުގެ އިތުރުން ހިސާބު ހެދުމަށް އުނދަގޫ ކުދިނަންނަށް ހާއްސަ 1 މަަސް ދުވަހުގެ ޕްރޮގުރާމެއްވެސް އެ ސެންޓަރުގައި ކުރިޔަށް ގެންދެއެވެ.

އިތުރަށް މައުލޫމާތު ދެމުން އާދަމް ޝަރީފް ވިދާޅުވީ ކުރިޔަށް އޮތް އަހަރު ތެރޭގައި އިނގިރޭސް ބަސް ޑިގުރީ ފެންވަރަށްވެސް ކިޔަވައިދެވޭނެ ގޮތް މަގުފަހި ވެގެންދާނެ ކަމަށެވެ. އަދި އޭގެ އިތުރުން ރިސޯޓް ދާއިރާއަށް ޝައުގުވެރިކަން ހުންނަ ފަރާތްތަކަށް ހާއްސަކޮށްގެން އިތުރުބަސްތައް ދަސްކޮށްދޭނެ ކުލާސްތައްވެސް ގާއިމް ކުރުމުގެ ވިސްނުން ގެންގުޅޭ ކަމަށެވެ.

އެގޮތުން ޗައިނާ، ރަޝިއާ، ޖަޕާން އަދި ސްޕެނިޝް ބަސް ދަސްކޮށްދިނުން ކުރިޔަށް އޮތް އަހަރު ތެރޭގައި ފެށިގެންދާނެ ކަމަށް އާދަމް ޝަރީފް ބުންޏެވެ. މީގެ އިތުރުން ކުޑަކުދިންނަށް އަރަބި ބަސް ދަސްކޮށްދިނުމަށް މަދީނާގެ ޔުނިވާސިޓީއަކާ މަޝްވަރާ ކުރެވެމުން ދާ ކަމަށްވެސް ޝަރީފް ފާހަގަކުރިއެވެ.

ކުޅުދުއްފުށި ކޮކާ ހަނދުވަރު ގޭގައި ހުންނަ މިސެންޓަރުން ހުޅުވާލެވިފައިވާ ޕްރޮގުރާމްތަކުގައި ބައިވެރިވުމަށް ޝައުގުވެރިވާ ފަރާތްތަކުން 9922881 އަށް ގުޅުއްވައިގެން ނަންނޯޓު ކުރެވޭނެ ކަމަށް އެ ސެންޓަރުން މައުލޭމާތު ދެއެވެ.