ދިރާގުން ލ. އަތޮޅު ހަމަދު ސްކޫލާއި އިހައްދޫ ސްކޫލުގެ ހާއްސަ އެހީއަށް ބޭނުންވާ ކުދިންގެ ކްލާހަށް ތަކެތި ހަދިޔާ ކޮށްފި

ދިރާގުން ލ. އަތޮޅު ހަމަދު ސްކޫލާއި އިހައްދޫ ސްކޫލުގެ ހާއްސަ އެހީއަށް ބޭނުންވާ ކުދިންގެ ކްލާހަށް ތަކެތި 100،000 ރުފިޔާގެ ތަކެތި ހަދިޔާކޮށްފި އެވެ.

މިދިޔަ ބުރާސްފަތި ދުވަހު ލ.ގަމު ހަމަދު ބިން ޙަލީފާ އައްޘާނީ ސްކޫލުގައި ބޭއްވުނު ހާއްސަ ހަފްލާއެއްގައި ދިރާގުގެ ފަރާތުން އިހައްދޫ ސްކޫލާއި މި ތަކެތި ހަވާލުކޮށްދިނީ ދިރާގުގެ ޗީފް މާކެޓިންގ އޮފިސަރ އިޒަބެލް ހަޖްރީ އެވެ. އަދި ހަމަދު ސްކޫލާއި މި ތަކެތި ހަވާލުކޮށްދެއްވީ ދިރާގުގެ ޑިރެކްޓަރ ސޭލްސް އެންޑް ކަސްޓަމަރ ސާވިސް، އަލީ ރިޔާޒެވެ.

އެގޮތުން މިދެ ސްކޫލުގައި  ތަފާތު ނުކުޅެދުންތެރިކަން ހުންނަ ކުދިންނަށް ހައްސަ ކުރެވިގެން ކުރިއަށް ގެންދާ ކްލާސްތަކުގައި ކިޔަވައިދިނުމަށް ބޭނުންވާ މުހިންމު ވަސީލަތްތަކެއް  ދިރާގުން ވަނީ ހަދިޔާކޮށްދީ ފަ އެވެ.

ހަމަދު ސްކޫލުގެ ފަރާތުން މިތަކެއްޗާއި ހަވާލުވެވަޑައިގެންނެވީ އެސްކޫލުގެ ޕްރިންސިޕަލް މުހަންމަދު ޝައުކަތެވެ. އަދި އިހައްދޫ ސްކޫލުން ތަކެއްޗާއި ހަވާލުވެވަޑައިގެންނެވީ ޕްރިންސިޕަލް ނަޖުމާ އަބްދުﷲ އެވެ.

ދިރާގުގެ ފަރަތުން ހަދިޔާ ކުރި ތަކެތީގެ ތެރޭގައި ކޮމްޕިއުޓާ ސިސްޓަމް، ތެރެޕީ ބޯލްސް، ބައިސިކަލް، ވުޑަން ޓޯއީސް ގެ އިތުރުން ވާހަކަ ފޮތާއި ޕްލޯ މެޓްސް ބީން ބޭގް ފަދަ ތަކެތި ހިމެނެ އެވެ. ހަމަދު ސްކޫލުގައި ތަފާތު ނުކުޅެދުންތެރިކަން ހުންނަ 16 ކުދިން، އަދި އިހައްދޫ ސްކޫލުގައި 30 އަށް ވުރެ ގިނަ ކުދިން މިހާރު ރަޖިސްޓްރީކޮށް ކިޔަވަމުންދާއިރު، މި ދެ ސްކޫލުގައިވެސް ހާއްސަ އެހީއަށް ބޭނުންވާ ކުދިންނަށް ހާއްސަ ކުލާހެއް ތައްޔާރުކޮށް ވޭތުވެދިޔަ މާރިޗު މަހުގެ ފަހުކޮޅު ކިޔަވައިދިނުމަށް ވަނީ ފަށާފައެވެ.