އޭޑީކޭއަށް ހިޔާނާތްތެރިވި ކަމުގެ ތުހުމަތުގައި ހައްޔަރުކުރި މުވައްޒަފުންގެ ތެރޭގައި ކުޅުދުއްފުށީ މީހަކު ހިމެނޭ

އޭ.ޑީ.ކޭ. ހޮސްޕިޓަލްގެ ތިން މުވައްޒަފަކު އެކުންފުނީގެ މިލިއަނަކަށްވުރެ ގިނަ ފައިސާއަށް ހިޔާނާތްތެރިވި ކަމުގެ ތުހުމަތުގައި ހައްޔަރުކޮށް އެމައްސަލަ ފުލުހުން ތަހްގީގު ކުރަން ފަށައިފިއެވެ.

އޭޑީކޭ ހޮސްޕިޓަލުން ގިނަ އަދަދެއްގެ ފައިސާއަށް އޭޑީކޭ ކޮމްޕެނީގެ 3 މުވައްޒަފަކު ހިޔާނާތްތެރިވިކަމަށް ތުހުމަތުކުރެވޭތީ އޭޑީކޭ ހޮސްޕިޓަލުން އެމައްސަލަ މޯލްޑިވްސް ޕޮލިސް ސާރވިސް އަށް ހުށަހަޅާފައިވަނީ 2016 އޭޕްރީލް 30 ވަނަ ދުވަހު އެވެ.

ފުލުހުން ބުނީ މިކަމުގެ ތުހުމަތުގައި ހައްޔަރުކޮށްފައިވަނީ އުމުރުން 19 އަހަރުގެ 2 ފިރިހެނުންނާއި އުމުރުން 21 އަހަރުގެ ފިރިހެނެކެވެ. މި 3 މީހުންނަކީވެސް ދިވެހިންކަމަށް ފުލުހުން ބުނެ އެވެ. މިމައްސަލައިގައި ތުހުމަތުގައި ހައްޔަރު ކުޅުދުއްފުށީ މީހަކީ ލީޑް، މުހައްމަދު ހުމާމު އެވެ..

މި މައްސަލަ މޯލްޑިވްސް ޕޮލިސް ސާވިސްއަށް ހުށަހެޅުމާއެކު ޑައިރެކްޓްރޭޓް އޮފް އިންޓެލިޖެންސާއި،  އިކޮނޮމިކް ކްރައިމް ޑިޕާޓްމަންޓާއި ފޮރެންސިކް ސާވިސަސް ޑައިރެކްޓްރޭޓާއި އޭ.ޑީ.ކޭ. ހޮސްޕިޓަލްގެ ސީނިއަރ މެނޭޖްމަންޓް ގުޅިގެންވަނީ 2016 މޭ 02 ވަނަ ދުވަހު ހާއްސަ އޮޕަރޭޝަނެއް ހިންގާފައިވާ ކަމަށެވެ.

އަދި މި މައްސަލާގެ ތުހުމަތުކުރެވުނު ތިން މީހުން ފުލުހުންގެ ބެލެމުގެ ދަށަށް ގެނައުމަށް ހިންގި ހާއްސަ އޮޕަރޭޝަންގައި އެމީހުން ފުލުހުންގެ ބެލުމުގެ ދަށަށް ގެނެސްފައިވަނީ ގިނަ އަދަދެއްގެ ފައިސާ އާއި ފައިސާގެ މުއާމަލާތް ކުރަން ބޭނުންކުރަމުންދިޔަ ވަސީލަތްތަކާއެކުކަމަށް ފުލުހުން ބުނެއެވެ.

މި މައްސަލަ އާއި ގުޅިގެން ކޯޓް އަމުރެއްގެ ދަށުން ހައްޔަރުކުރި ފުރަތަމަ މީހާ ހައްޔަރުކޮށްފައިވަނީ ގިނަ އަދަދެއްގެ ފައިސާއާއި ފައިސާގެ މުއާމަލާތް ކުރަން ބޭނުންކުރާ ވަސީލަތްތަކާއެކު އޭ.ޑީ.ކޭ. އާއި ދިމާ މަގުމަތިން ކަމަށާއި އަނެއް ދެ މީހުން ހައްޔަރު ކޮށްފައިވަނީ އޭ.ޑީ.ކޭ. ހޮސްޕިޓަލްގެ ތެރެއިންކަމަށްވެސް ފުލުހުން ބުނެ އެވެ.

ފުލުހުން ބުނީ ހޮސްޕިޓަލުން ހައްޔަރުކުރި 2 މީހުންގެ ތެރެއިން އެކެއްގެ އަތުން ގިނަ އަދަދެއްގެ ފައިސާ އާއި ފައިސާގެ މުއާމަލާތް ހިންގުމަށް އެމީހުން ބޭނުންކުރާ ވަސީލަތްތައް ފެނިފައިވާއިރު އަނެއް މީހާގެ އަތުންވެސް ފައިސާގެ މުއާމަލާތްތައް ހިންގުމަށް އެމީހުން ބޭނުންކުރާ ވަސީލަތްތައް ފެނިފައިވާ ކަމަށެވެ.

ފުލުހުން ބުނީ މިހާތަނަށް ތަހްގީގުން ހޯދި ހޯދުންތަކުން އެނގޭގޮތުގައި 2016 ޖެނުއަރީ 01 ވަނު ދުވަހުން ފެށިގެން 2016 އޭޕްރީލް 29 ވަނަ ދުވަހާއި ހަމައަށް އިސްވެދެންނެވުނު ތިން މުވައްޒަފުން ގުޅިގެން އެއް މިލިޔަން ރުފިޔާއަށްވުރެ ގިނަ އަދަދެއްގެ ފައިސާ އަށް އެ 3 މުވައްޒަފުން ހިޔާނާތްތެރި ވެފައިވާ ކަމަށެވެ.

މި މައްސަލާގައި ތުހުމަތުކުރެވޭ ތިން މީހުން ދިރިއުޅޭތަން ކޯޓް އަމުރެއްގެ ދަށުން ބަަލައިފާސްކުރިއިރު ގިނަ އަދަދެއްގެ ފައިސާ އާއި މިމައްސަލައާއި ގުޅުންހުރި ތަކެތި އެތަންތަނުންވެސް ފެނިފައިވާ ކަމަށް ފުލުހުން ބުނެ އެވެ.

މި މައްސަލާގައި ހައްޔަރުކުރި ތިން މުވައްޒަފުންގެ ބަންދުގެ މުއްދަތު ގޮތުގައި ކުރިމިނަލް ކޯޓުން ވަނީ 7 ދުވަސް ޖަހާދީފަ އެވެ.

މި މައްސަލަ މޯލްޑިވްސް ޕޮލިސް ސާރވިސްގެ ކްރައިމް އިންވެސްޓިގޭޝަން ކޮމާންޑްގެ ސްޕެޝަލިސްޓް ކްރައިމްގެ އިކޮނޮމިކް ކްރައިމް ޑިޕާޓްމަންޓުން ދަނީ އިތުރަށް ތަހްގީގު ކުރަމުންނެވެ.