ބީއެމްއެލްގެ ބާޒާރު ބުރާންޗު ޑޮލަރުވިއްކަން ހާއްސަ ބުރާންޗަކަށް ހަދައިފި

ސަރުމީލާ ހަސަން

ބޭންކު އޮފް މޯލްޑިވްސް އިން ރާއްޖެއިން ބޭރަށް ދަތުރުކުރާ ފަރާތްތަކަށް ޑޮލަރުވިއްކަން ހާއްސަ ބްރާންޗަކަށް ބީއެމްއެލް ބާޒާރު ބުރާންޗް ހަދައިފި އެވެ.

ބީއެމްއެލްގެ ފަރާތުން މާލޭގައި ޑޮލަރު ވިއްކާނީ ބާޒާރު ބްރާންޗުން ކަމަށާއި، މިމަހުގެ އަށްވަނަ ދުވަހުން ފެށިގެން ރާއްޖެއިން ބޭރަށްދާ ފަރާތްތްތަކަށް ބީއެމްއެލްގެ ބާޒާރު ބްރާންޗްގައި ހާއްސަ ކައުންޓަރު ތަކުން ޑޮލަރު ވިއްކަމުންދާނެ ކަމަށެވެ.

ބޭންކުން ބުނީ މި ބަދަލު ގެނައީ ކަސްޓަމަރުންނަށް ދޭ ހިދުމަތުގެ ފެންވަރު ރަނގަޅުކުރުމުގެ ގޮތުންކަމަށާއި، ކަސްޓަމަރުންނަށް ވީހާވެސް ލުއި ފަސޭހަކަމާއެކު މި ޚިދުމަތް ދިނުމުގެ ގޮތުން ވަކި ހާއްސަ ޓީމެއް އެއް ބްރާންޗެއްގައި ގާއިމްކޮށް މި ހިދުމަތް ދިނުމަށް ނިންމީ ކަމަށެވެ.

އެބޭންކުން ހާމަކުރާގޮތުގައި ކޮންމެ ކަސްޓަމަރަކަށް ވެސް ގިނަވެގެން ވިއްކާނީ 500 ޑޮލަރެވެ. ޑޮލަރު ގަންނަން އަންނައިރު ޕާސްޕޯޓާއި ދަތުރުކުރާ ގޮތަށް ހަމަޖެހިފައިވާ ޓިކެޓް ހުށަހަޅަން ޖެހޭއިރު ޑޮލަރު ވިއްކަމުންދާނީ ބޭންކުގެ ހިދުމަތް ދޭ ގަޑިތަކުގައެވެ.

މި ބަދަލާއެކުވެސް، ރާއްޖެއިން ބޭރަށްދާ ފަރާތްތަކަށް ވިއްކާ ޑޮލަރު ފިޔަވައި އެހެން ބޭނުންތަކަށް ޑޮލަރު ވިއްކުމުގެ ހިދުމަތްް ކުރިއެކޭވެސް އެއްގޮތަށް ބޭންކުގެ އެހެން ބްރާންޗްތަކުން ލިބެމުންދާނެކަމަށް ބީއެމްއެލް އިން ބުނެއެވެ.