މޫސުން ގޯސްވެދާނެ ކަމަށް ލަފާކޮށް މުޅި ރާއްޖެއަށް ވައިޓް އެލާޓް ނެރެފި

މުޅި ރާއްޖެއަށް މޫސުން ގޯސްވެ ހުރިހާ ހިސާބަކަށް ވިއްސާރަ ކުރާނެ ކަމަށް ލަފާކޮށް މެޓް އޮފީހުން ވައިޓް އެލާޓް ނެރެފި އެވެ.

މިއަދު 11:00 ގައި މެޓް އޮފީހުން ނެރެފައިވާ އެލާޓުގައި ބުނެފައި ވަނީ ކުރިއަށް އޮތް 24 ގަޑިއިރު މޫސުން ލަފާކުރެވޭގޮތުގައި ރާއްޖޭގެ ބައެއް ރަށް ތަކަށް ބޯކޮށްވާރޭވެހި، ބައެއް ރަށްރަށަށް ގުގުރުންވެސް އެކަށީގެން ވާކަމަށެވެ.

އޭގެއިތުރުން ވައިޖެހޭނެ ކަމަށް ލަފާ ކޮށްފައިވަނީ ހުޅަނގު ދެކުނާއި ހުޅަނގުން، މެދު ތެރެއާއި އުތުރުގެ އަތޮޅު ތަކަށް ގަޑިއަކު 5 މޭލާއި 15 މޭލާއި ދެމެދުގެ ބާރުމިނުގަ އެވެ.

އަދި އެންމެ ދެކުނުގެ އަތޮޅު ތަކަށް ގަޑިއަކު 10 މޭލާއި 20 މޭލާއި ދެމެދުގެ ބާރު މިނުގައި ވައި ޖެހޭނެ ކަމަށް ލަފާ ކުރެވޭ ކަމަށާއި، ވިލާގަނޑުގައި ގަޑިއަކު ގާތްގަނޑަކަށް 35 މޭލަށް ވައިގަދަވުން އެކަށީގެން ވާކަމަށް މެޓް އޮފީހުން ބުނެއެވެ.

ދެކުނުގެ ކަނޑުތައް އާދައިގެ ވަރަކަށް ގަދަވެފައި ވިލާގަނޑުގައި ކަނޑުތައް ގަދަވާނެ ކަމަށާއި މެދުތެރެއާއި އުތުރުގެ ކަނޑުތައް އާދައިގެ ވަރަކަށް މަޑުވާނެ ކަމަށް މެޓް އޮފީހުން ލަފާ ކުރައެވެ.

ރާއްޖެއަށް މިހާރު ކުރަމުން ދަނީ ދެމޫސުން ބެދޭ ވިއްސާރަ ކަމަށް މެޓް އޮފީހުން މީގެ ކުރިން ވަނީ ބުނެފަ އެވެ.