ގުރުއާނާ ބެހޭ މަރުކަޒުގެ ބުރާންޗް ނުހުޅުވި ލަސްވަމުންދަނީ ޓީޗަރުން ނުލިބިގެން: ކުޅުދުއްފުށީ ކައުންސިލް

ކުޅުދުއްފުށީގައި ގާއިމްކުރާ ގުރުއާނާ ބެހޭ މަރުކަޒުގެ ގޮފީގެ  ނުހުޅުވި  ލަސްވަމުންދަނީ މުދައްރިސުން ނުލިބިގެން ކަމަށް ކައުންސިލުން ހާމަކޮށްފި އެވެ.

ކުޅުދުއްފުށީގައި ގުރުއާނާ ބެހޭ މަރުކަޒުގެ ބުރާންޗެއް ހުޅުވުމުގެ މަސައްކަތް ކައުންސިލުން ފެށީ 2014 ވަނަ އަހަރުގެ ތެރޭގައި އެވެ. އަދި އެކަމަށް ހަމަޖެއްސި އިމާރާތުގެ އާބާތުރަފިލުވުމުގެ މަސައްކަތް ވެސް މިހާރު ވަނީ ނިންމާލާފަ އެވެ

ކުޅުދުއްފުށި އޮންލައިނަށް މައުލޫމާތު ދެއްވަމުން ކައުންސިލުގެ ރައީސް އަލީ މުހައްމަދު ގުރުއާނާ ބެހޭ މަރުކަޒަށް މުދައްރިސުން ހޯދުމަށް 3 ފަހަރަށް އިއުލާންކޮށް، ވެސް ޓީޗަރުން ލިބިފައިނުވާ ކަމަށެވެ.

ގުރުއާނާ ބެހޭ މަރުކަޒުގެ ގޮއްޕަށް ޓީޗަރުން ލިބުނުހާ އަވަހަކަށް އެތަން ހުޅުވައި ކޯސްތައް ފަށާނެ ކަމަށް އަލީ ވިދާޅުވި އެވެ.

ކައުންސިލުގެ ބަޖެޓުން ހަރަދުކޮށްގެން ގުރުއާނާ ބެހޭ މަރުކަޒުގެ ގޮފި ހިންގުމަށް ހަމަޖެހިފައިވާ “ހިދުމަތް” ގެ އާބާތުރަފިލުވުމުގެ މަސައްކަތް ވެސް ވަނީ މިހާރު ނިމިފަ އެވެ.

ކުޅުދުއްފުށީގައި ގާއިމްކުރާ މިގޮފިން ކޯސްތަކުގެ އިތުރުން ގުރުއާން ބޭހޭ މަރުކަޒުން ދޭން އެހެން ބައެއް ހިދުމަތްތައް ވެސް ލިބިގެންދާނެ ކަމަށް ކައުންސިލުން ބުނެއެވެ.