ށ އަތޮޅުގައި ކުށްމަދު ވެއްޓެއް ގާއިމް ކުރުމަށް އެހީތެރިވެދިނުމުގެ ގޮތުން އަތޮޅު ކައުންސިލުން 1 ލައްކަ ރުފިޔާ ދިނުމަށް ނިންމައިފި

ށ އަތޮޅުގައި ކުށްމަދު ވެއްޓެއް ގާއިމްކުރުމަށް ފުނަދޫ ޕޮލިސް ސްޓޭޝަނުން ކުރިއަށްގެންދާ ޕްރޮގްރާމުތައް ހިންގުމަށް އެއްލައްކަ ރުފިޔާގެ މާލީ އެހީ ދިނުމަށް ށ. އަތޮޅު ކައުންސިލުން ނިންމައިފި އެވެ.

އެގޮތުން މި އެއްބަސް ވުމުގެ މަގުމަތީގެ ރައްކާތެރިކަން ކަށަވަރަކުރުމަށާއި މަސްތުވާ ތަކެއްޗާމެދު ޒުވާނުންނާއި އާންމުން ހޭލުންތެރިކުރުމަށާއި، ކުށްކުރުން މަދު ވެއްޓެއް ބިނާކުރުމަށާއި، ކުށުގެ ސަބަބުން އަނިޔާ ލިބޭ ފަރާތްތަކަށް ރައްކާތެރިކަން ފޯރުކޮށްދިނުން ހިމެނޭ ކަމަށް ށ އަތޮޅު ކައުންސިލުން މައުލޫމާތު ދެ އެވެ.

އަދި އޭގެ އިތުރުން ގެވެށި އަނިޔާ ހުއްޓުވުމަށާއި، ގެވެށި އަނިޔާގެ ޝިކާރަޔަކަށްވެފައިވާ ފަރާތްތަކަށް ރައްކާތެރިކަން ފޯރުކޮށްދިނުމަށާއި، އަންހެނުންނާއި އިސްރަށްވެހިންނާއި ކުޑަކުދިންގެ ހައްގުތައް ރައްކާތެރިކުރުމަށް އަދި ހޭލުންތެރިކުރުމަށް ށ. އަތޮޅުގައި ފުލުހުން ރާވައި، ހިންގާ ތަފާތު ޕްރޮގްރާމްތަކަށް މާލީ އެހީތެރިކަން ފޯރުކޮށްދީ ޕްރޮގްރާމްތަކުން ޙާސިލުކުރަން ބޭނުންވާ މަގުސަދު ހާސިލް ކުުރުމަށް އެހީވެދިނުން ވެސް މި އެއްބަސް ވުމުގައި ވެއެވެ.

ކައުންސިލް އިދާރާގެ ޖަލްސާކުރާ  ހޯލުގައި ބޭއްވުނު ބައްދަލުވުމުގައި އަތޮޅުކައުންސިލްގެ ފަރާތުން މި އެއްބަސް ވުމުގައި ސޮއިކުރެއްވީ އެ ޕްރޮގްރާމުގެ ކޯޑިނޭޓަރ އަދި އަތޮޅުކައުންސިލަރ ޢަބްދުﷲ ނާހިދެވެ. ށ.ފުނަދޫ ޕޮލިސް ސްޓޭޝަންގެ ފަރާތުން ސޮއިކުރެއްވީ ށ. އަތޮޅުގެ އެޓޯލް ކޮމާންޑަރ ސަބް އިނިސްޕެކްޓަރ އޮފް ޕޮލިސް އިބްރާހީމް މުސްތަފާއެވެ.

މި ރަސްމިއްޔާތުގައި ށ.އަތޮޅު ކައުންސިލް އިދާރާގެ އިސް މުވައްޒަފުންނާއި، ށ.ފުނަދޫ ޕޮލިސް ސްޓޭޝަންގެ އިސްވެރިން ބޭފުޅުން ބައިވެރިވެވަޑައިގެންނެވިއެވެ.