ބީއެމްއެލް އިން ކުޑަކުދިންނަށް ހާއްސަ އެކައުންޓެއް ތައާރަފްކޮށްފި

ކުޑަކުދިންގެ ދުވަހާއި ގުޅުވައިގެން ބޭންކް އޮފް މޯލްޑިވްސް އިން ކުޑަކުދިންނަށް ހާއްސަ “ކިޑްސް ސޭވާ” ގެ ނަމުގައި އެކައުންޓެއް ތައާރަފްކޮށްފި އެވެ.

މި އެކައުންޓް ތަޢާރަފް ކޮށްފައިވަނީ މިއަދު ހަވީރު ބީއެމްއެލްގެ ހެޑް އޮފީހުގައި ބޭއްވި ހާއްސަ ރަސްމިއްޔާތެއްގަ އެވެ. މި އެކައުންޓް ކުޑަކުދިންގެ ނަމުގައި ހުޅުވޭއިރު ކުދިންނަށް 18 އަހަރުވަންދެން އެކައުންޓްގެ ހުރިހާ ހައްގެއް ބެލެނިވެރިންނަށް ލިބޭނެ އެވެ. އަދި 18 އަހަރު ވުމުން ކުއްޖާއަށް އެކައުންޓްގެ ހައްގުތައް ލިބިގެންދާނެ ކަމަށެވެ. އެހެންނަމަވެސް ޗެކްފޮތާއި، ކާޑު ދޫކުރާނީ ކުއްޖާއަށް 18 އަހަރު ފުރުމާއި ނެވެ.

މުހިއްމު ހާލަތެއްގައި އެކައުންޓުގައި ޖަމާކޮށްފައި ހުރި ފައިސާ ކުއްޖާއަށް 18 އަހަރު ވުމުގެ ކުރިން ބެލެނިވެރިޔާ ނަގަން ބޭނުންވެއްޖެ ހާލަތެއްގައި ކޮންމެ މަހަކު އެއް ފަހަރު އެފުރުސަތު ލިބިގެންދާނެ ކަމަށް ބީއެމްއެލްއިން މައުލޫމާތު ދެއެވެ.

ކުރިއަށް އޮތްތަނުގައި މި އެކައުންޓަށް މުހިއްމު ފީޗާތައް އެކުލަވާލުމަށް ބީއެމްއެލްއިން ނިންމާފައިވާ އިރު އެކައުންޓުތައް ހުޅުވާފައި ތިބި ކުދިންގެ މެދުގައި ކޮންމެ އަހަރަކު ލަކީޑްރޯއެއްވެސް ވަނީ ނެގުމަށް ހަމަޖެހިފަ އެވެ،

ބީއެމްއެލް “ކިޑްސް ސޭވާ” އެކައުންޓް ހުޅުވުމަށް ޑިޕޮޒިޓެއްގެ ގޮތުގައި 100 ރުފިޔާ ނުވަތަ 10 ޑޮލަރު ޖަމާކުރަން ޖެހެއެވެ.