މޮބައިލްމަނީގެ ހިދުމަތް ފުޅާ ކުރުމަށް އުރީދޫ އާއި އެސްޓީއޯ ގުޅިއްޖެ

މޮބައިލް މަނީ މެދުވެރިކޮށް ހިދުމަތްތައް ރާއްޖޭގައި ފުޅާކުރުމަށްޓަކައި އުރީދޫ މޯލްޑިވްސް އާއި އެސްޓީއޯ ގުޅިއްޖެ އެވެ.

އެގޮތުން ރާއްޖޭގައި މީހުން ދިރިއުޅޭ ހުރިހާ ރަށެއްގައި ގާއިމްކުރެވިފައިވާ އެސްޓީއޯ ފާމަސީތަކުން އުރީދޫ މޯބައިލް މަނީގެ ހިދުމަތް ފޯރުކޮށްދެވިގެން ދާނެ އެވެ.

ފައިސާގެ މުއާމަލާތްތައް ކުރުން ފަސޭހަކޮށްދޭ މިހިދުމަތް ރާއްޖޭގެ އެންމެހާ ރައްޔިތުންނަށް ފޯރުކޮށްދިނުމަށްޓަކައި އުރީދޫގެ ހެޑް އޮފީހުގައި ބޭއްވުނު ހާއްސަ ރަސްމިއްޔާތެއްގައި މި އެއްބަސްވުމުގައި ސޮއި ކުރެއްވީ އެސްޓީއޯގެ މެނޭޖިންގް ޑައިރެކްޓަރ އަހުމަދު ޝަހީރު އަދި އުރީދޫގެ ސީއީއޯ ވިކްރަމް ސިންހަ އެވެ.

މި އެއްބަސް ވުމުގެ ދަށުން އުރީދޫއާއި އެސްޓީއޯއިން، އެސްޓީއޯގެ ކަސްޓަމަރުންނަށް އުރީދޫ މޮބައިލް މަނީ މެދުވެރިކޮށް ފައިސާ ދެއްކޭނެ އިންތިޒާމެއް ހަމަޖެއްސުމަށްޓަކައި ދަނީ މަސައްކަތް ކުރަމުންނެވެ.

އަދި މި އެގްރީމެންޓްގެ ދަށުން އެސްޓީއޯގެ ފަރމަސީތައް މެދުވެރިކޮށް ދިވެހި ރައްޔިތުންނަށް އުރީދޫގެ މޮބައިލް މަނީ ހިދުމަތަށް ރަޖިސްޓަރީ ކޮށް، މޮބައިލް މަނީ އެކައުންޓަށް ފައިސާ ޖަމާކޮށް، އެކައުންޓުން ފައިސާ ނެގޭނެއެވެ.

ރާއްޖޭގައި މީހުން ދިރިއުޅޭ ކޮންމެ ރަށެއްގައި އެސްޓީއޯ ފާރމަސީ އެއް ގާއިމް ކުރެވިފައިވާ ވުމާއެކު، މި ޕަރޓްނާޝިޕްގެ ސަބަބުން ދިވެހި ރާއްޖޭގެ ކޮންމެ ރައްޔިތަކަށްވެސް، ވަރަށް ފަސޭހަކަމާއި އެކު، އުރީދޫ މޮބައިލް މަނީ މެދުވެރިކޮށް ފޯރުކޮށްދެވޭ ހުރިހާ ހިދުމަތެއްވެސް ބޭނުންކުރުމުގެ ފުރުސަތު ފޯރުކޮށްދެވިގެން ދާނެ ކަމަށް އުރީދޫއިން މައުލޫމާތު ދެއެވެ.

ރާއްޖެއަށް މުޅިން އައު ހިދުމަތެއް ކަމަށްވާ މޮބައިލް މަނީ ތައާރަފްކޮށް މިއަހަރު ޕައިލޮޓް ސްޓޭޖް ފަށާފައިވާއިރު އުރީދޫގެ އަމާޒަކީ މޮބައިލް މަނީގެ ހިދުމަތާއި އެކު ކަސްޓަމަރުންނަށް އިތުރު ފަސޭހަކަމާއި ރައްކާތެރިކަމާއި އެކު ފައިސާގެ މުއާމަލާތްތައް ކުރިއަށް ގެންދިއުމުގެ ފުރުސަތު ލިބިގެންދިއުން ކަމަށް އުރީދޫއިން މައުލޫމާތު ދެއެވެ.