ސަރުކާރުގެ ތައުލީމީ ސިޔާސަތު ހާމަކުރެއްވުމަށް އެޑިއުކޭޝަން މިނިސްޓަރ ށ އަތޮޅަށް

ސަރުކާރުގެ ތައުލީމީ ސިޔާސަތު ހާމަކުރައްވައި އޭގެ މައުލޫމާތު ހިއްސާކުރެއްވުމަށް އެޑިޔުކޭޝަން މިނިސްޓަރ ޑރ. އާއިޝަތު ޝިހާމް ށ. އަތޮޅަށް ދަތުރުފުޅު ފަށްޓަވައިފި އެވެ.

އެޑިއުކޭޝަނުން ވިދާޅުވީ މިނިސްޓަރުގެ މިދަތުރުފުޅުގައި ސަރުކާރުގެ ތައުލީމީ ސިޔާސަތުގެ ދަށުން އެއްވެސް ކުއްޖަކު ބާކީނުކުރުމަށް އެޑިޔުކޭޝަން މިނިސްޓްރީން ކުރައްވަމުންގެންދާ މަސައްކަތްތަކުގެ މައުލޫމާތު އެފަރާތްތަކާއި ހިއްސާކުރެއްވުމަށް ހަމަޖެހިފަވާ ކަމަށެވެ.

އަދި ސްކޫލުތަކުގައި ކިޔަވައިދިނުމުގެ ފެންވަރު އިތުރުކުރުމާއި ބެހޭ ގޮތުންނާއި، ސުކޫލުތަކަށް ދިމާވާ ދަތިތަކާބެހޭ ގޮތުން ވާހަކަދެކެވި އެކަންތައްތައް ހައްލު ކުރެވިދާނެ ގޮތްތަކާބެހޭގޮތުން މަޝްވަރާ ކުރައްވާނެކަމަށް އެމިނިސްޓްރީ ހާމަކުރެ އެވެ.

މީގެ އިތުރުން، ދަސްވާރު ޕްރޮގްރާމާއި، ބީޓެކް ސްޓްރީމާއި ބެހޭ ގޮތުން ސުކޫލްތަކުގެ ދަރިވަރުންނާއި ބެލެނިވެރިންނަށް މައުލޫމާތު ފޯރުކޮށްދީ، މިނިސްޓްރީގެ ޑިޕާޓްމަންޓްތަކުން ކުރަމުންގެންދާ މަސައްކަތްތަކާއި ގުޅޭ މައުލޫމާތު ސްކޫލްތަކުގައި އެ މަސައްކަތްތަކާއި ހަވާލުވެ ތިބި މުއައްޒިފުންނަށް ފޯރުކޮށްދޭނެކަމަށްވެސް މިނިސްޓްރީން މައުލޫމާތުދެއްވަ  އެވެ.

އަދި މިނިސްޓްރީ އާއި އެމްއެންޑީއެފް ގުޅިގެން ސްކޫލްތަކުގައި ކުރިއަށްގެންދާ ތަރުބަވީ ޖީލު ބިނާކުރުމުގެ ޕްރޮގްރާމް ސްކޫލްތަކުގެ ދަރިވަރުންނަށާއި ބެލެނިވެރިންނަށް ދެއްވުމަށް ހަމަޖެހިފަ އެވެ.

މި ދަތުރުފުޅުގައި މިނިސްޓަރ ފުރަތަމަ  ޒިޔާރަތް ކުރައްވާފައިވަނީ ކަނޑިތީމުގައި ހުންނަ ށ. އަތޮޅު މަދަރުސާ އަށެވެ. އަދި އިއްޔެ މިނިސްޓަރ ޒިޔާރަތްކުރެއްވީ ގޮއިދޫ ސްކޫލަށާއި، ބިލެތްފަހި ސްކޫލަށާއި، ފޭދޫ ސްކޫލަށާއި، ނޫމަރާ ސްކޫލަށް އަދި ފޯކައިދޫ ސްކޫލަށެވެ.

މިއަދު މިނިސްޓަރު ވަޑައިގަތުމަށް ހަމަޖެހިފައިވަނީ މަރޮށީ ގައި ހުންނަ މަދްރަސަތުލް މުނައްވަރާ އަށާއި، ކޮމަންޑޫ ގައި ހުންނަ ށ. އަތޮޅު ތައުލީމީ މަރުކަޒަށް އަދި މާއުނގޫދޫ ސްކޫލަށް އެކަމަނާ ޒިޔާރަތް ކުރައްވާ އިރު، ހުކުރު ދުވަހު ޒިޔާރަތް ކުރައްވާނީ ފުނަދޫ ސްކޫލަށާއި، ޅައިމަގު ސްކޫލަށް އަދި ނަރުދޫ ސްކޫލަށާއި މިލަންދޫ ސްކޫލަށް ކަމަށް މިނިސްޓްރީ މައުލޫމާތު ދެއްވައެވެ.

މިދަތުރުފުޅުގައި އެކަމަނާގެ އެންމެ ފަހު މަންޒިލެއްގެ ގޮތުގައި ހޮނިހިރު ދުވަހު ޒިޔާރަތްކުރުމަށް ހަމަޖެހިފައިވަނީ ފީވަކު ސްކޫލަށެވެ.

މިނިސްޓަރ ގެ މި ދަތުރުފުޅުގައި ސްކޫލްތަކުގެ ސީނިއަރ މެނޭޖްމަންޓާއި، ޓީޗަރުންނާއި، ސްކޫލް ބޯޑާއި، ޕީޓީއޭ ހިންގާ ކޮމިޓީގެ ބޭފުޅުންނާއި އަދި ރަށު ކައުންސިލްގެ ބޭފުޅުންނާއި ބައްދަލުކުރައްވާނެ އެވެ.

މިނިސްޓަރގެ މި ދަތުރުފުޅުގައި އެކަމަނާގެ އަރިހުގައި އެޑިޔުކޭޝަން މިނިސްޓްރީގެ ބައެއް އިސްވެރިން ބައިވެރިވެވަޑައިގަންނަވައެވެ.