ކުޅުދުއްފުށީ ހޮސްޕިޓަލުގައި ލޮލުގެ ޑޮކްޓަރެއް ނެތި 7 މަސް!

ކުޅުދުއްފުށީގައި ހުންނަ ސަރަހައްދީ ހޮސްޕިޓަލްގައި ލޮލުގެ ހާއްސަ ޑޮކްޓަރެއްގެ ހިދުމަތް ނުލިބޭތާ 7 މަސްދުވަސް ވެއްޖެ އެވެ.

ކުރިން ހުރި ލޮލުގެ ޑޮކްޓަރު ގޮސްފައިވަނީ މިދިޔަ އަހަރުގެ ސެޕްޓެމްބަރުމަހު އެވެ. އެއަށް ފަހުން އެހޮސްޕިޓަލުން ލޮލުގެ ހިދުމަތް ހުއްޓިފައި ހުންނަތާ މިހާރު 8 މަސް ވަނީ އެވެ.

“ކުޅުދުއްފުށި އޮންލައިނަށް” މައުލޫމާތު ދެމުން އެ ހޮސްޕިޓަލުގެ އޮފިޝަލަކު ވިދާޅުވީ ލޮލުގެ ޑޮކްޓަރެއް ހޯދައިދިނުމަށް މިނިސްޓްރީގައި އެދިފައިވާނެ ކަމަށާއި މިނިސްޓްރީ އެކަން ކުރަމުންގެންދާ ކަމަށެވެ.

ލޮލުގެ ޑޮކްޓަރެއް މިހާރު ހަމަޖެހިފައިވާ ކަމަށާއި އަންނަ ހަފްތާ ތެރޭގައި ކުޅުދުއްފުއްޓަށް އޭނާ އައިސް ހިދުމަތް ފެށިގެންދާނެ ކަމަށް ލަފާކުރައްވައި ކަމަށް އޮފިޝަލް ވިދާޅުވި އެވެ.

ލޮލުގެ ޑޮކްޓަރެއް ނެތި ގިނަ މަސްތަކެއް ވެފައިވާއިރު ގިނަ ރައްޔިތުންތަކެއް ދަނީ ކަންބޮޑުވުންފާޅުކުރަމުނެވެ.

ކުޅުދުއްފުށީގައި ހުންނަ ސަރަހައްދީ ހޮސްޕިޓަލަކީ އައިޖީއެމްއެޗް ފިޔަވާ އެންމެ ގިނަ އަދަދެއް އާއްމުން ހިދުމަތް ހޯދަމުން އަންނަ ސަރުކާރު ހޮސްޕިޓަލެވެ. އެހެން ނަމަވެސް އެތަނުގެ ހިދުމަތުގެ ފެންވަރު ރަނގަޅުކުރުމަށް ސަރުކާރުން އެއްވެސް މަސައްކަތް ކުރާތަނެއް ނުފެނެ އެވެ.