ނޭކުރަންދޫ ޖަލުގެ މަސައްކަތް އޮތް ހިސާބެއް ބެލުމަށް ހޯމް މިނިސްޓަރާއި ބައްދަލުކުރައްވައިފި

-ޝަރުމީލާ ހަސަން-

ހދ ނޭކުރަންދޫގައި ސަރުކާރުން އަޅަން ހަމަޖެހިފައިވާ ޖަލުގެ މަސައްކަތް ގޮސް އޮތް ހިސާބެއް ބެލުމަށް އެރަށު ކައުންސިލުން މިނިސްޓަރ އޮފް ހޯމްއެފެއާޒް އަދި ލޯކަލްގަވަރމަންޓް އޮތޯރިޓީގެ ރައީސް އުމަރު ނަޞީރާއި ބައްދަލުކުރައްވައިފި އެވެ.

ހޯމް މިނިސްޓްރީގައި ބޭއްވި މިބައްދަލުކުރެއްވުމުގައި މަޝްވަރާކުރެވުނީީ ނޭކުރެންދޫގައި އެޅުމަށް ހަމަޖެހިފައިވާ ޖަލުގެ އެޅުމުގެ މަސައްކަތް ގޮސްފައިވާ ހިސާބަކާ ގުޅޭގޮތުންނާއި، ޖަލުގެ އެޅުމަށް ހަމަޖެހިފައިވާ ސަރަހައްދު ސާފުކުރުމާއި ބެހޭ ގޮތުންނެވެ.

އަދި ޖަލުގެ މުވައްޒަފުން ހޯދައި އިރު ނޭކުރަންދޫގެ ރައްޔިތުންނަށް އިސްކަން ދިނުމަށް ކައުންސިލުން އެދިލެއްވި އެވެ.

މިބައްދަލުކުރެއްވުމުގައި މިނިސްޓަރ ވިދާޅުވީ ޖަލުގެ މަސައްކަތް ވަރަށް ބާރަށް ކުރިއަށްދާކަމަށާއި މިގޮތުން ޖަލުގެ ޕްރީ-ފެބް މޮޑިއުލްތައް ތައްޔާރުކުރުމަށް ފައިސާ ދެއްކިފައިވާ ކަމާއި އަދި ޗައިނާއިން ޕްރީ-ފެބް މޮޑިއުލްތައް ލިބުނުހާ އަަވަހަކަށް ޖަލު ރޭވުމުގެ ކަންތައް ފަށާނެކަމަށެވެ.

އަދި މިނިސްޓަރވެސް ވިސްނުންފުޅަކީ ޖަލަށް ބޭނުންވާ މުވައްޒަފުން ހޯދުމުގައި ނޭކުރަންދޫއަށް އިސްކަން ދެއްވުން ކަމުގައި ފާހަގަކުރެއްވިއެވެ.

މިބައްދަލުކުރެއްވުމުގައި ނޭކުރެންދޫ ކައުންސިލްގެ ރައީސް މުޙައްމަދު ސިޒާން އާއި މެންބަރު ޢަލީ އާދަމް ބައިވެރިވެލެއްވި އެވެ.