ނަރުދަމާގެ މަސައްކަތުގެ ނިންމުން ފާހަގަކުރެއްވުމަށް މާދަމާ ރައީސް ހޯރަފުއްޓަށް

ސަރުކާރުން ހއ. ހޯރަފުށީގައި ގާއިމްކުރި ނަރުދަނާގެ މަސައްކަތުގެ ނިންމުން ފާހަގަކުރެއްވުމަށް މާދަމާ ރައީސުލް ޖުމްހޫރިއްޔާ އަބުދުﷲ ޔާމީން އަބުދުލް ގައްޔޫމް އެރަށަށް ވަޑައިގަންނަވާ ގޮތަށް ހަމަޖެހިއްޖެ އެވެ.

ސަރުކާރުން 60 މިލިއަން ރުފިޔާ ހަރަދުކޮށްގެން ކުރިއަށްގެން އެ ޕްރޮޖެކްޓްގެ މަސައްކަތް މީގެ ދެއަހަރު ދުވަހު ކުރިން އިފްތިތާހްވެސް ކުރެއްވީ ރައީސުލް ޖުމްހޫރިއްޔާ އަބުދުﷲ ޔާމީން އަބުދުލް ގައްޔޫމެވެ.

ސަބް ކޮންޓެކްޓަރެއްގެ ގޮތުން ސާސް ކޮންސްޓުރަކްޝަން ނަމަކަށް ކިޔާ ކުންފުންޏާ ހަވާލުކޮށްގެން ކުރިއަށްގެންދިޔަ މިމަސްރޫއު ކުރިއަށްގެންގޮސްފައިވަނީ އެމްޑަބްލިޔުއެސްސީން އެވެ.

މި ޕްރޮޖެކްޓުގެ ދަށުން ހޯރަފުށީގެ 400 ވަރަކަށް ގޭގައި ނަރުދަމާ އަޅައި 15.7 ކިލޯ މީޓަރުގެ ނަރުދަމާ ނެޓްވޯކެއް ގާއިމްކޮށްފައިވެ އެވެ.

މިއީ ރައީސް ޔާމީންގެ ވެރިކަމުގައި އެމަނިކުފާނު ހޯރަފުއްޓަށް ވަޑައިގަންނަވާ 2 ވަނަ ފަހަރެވެ. މާދަމާ ހޯރަފުށީގައި އިތުރު ތަރައްގީގެ މަސްރޫއު ތައް ރައީސް އިއުލާންކޮށްދެއްވާނެ ކަމުގެ މައުލޫމާތު ވަނީ ލިބިފަ އެވެ.