ހއ އަތޮޅުގައި ޑެންގީ ހުން މިވަގުތަށް ވަނީ ކޮންޓްރޯލް ކުރެވިފަ

އޭޕްރީލްމަހާއި މިމަހު ކުރީކޮޅުގައި ހއ އަތޮޅުގައި ފެތުރުނު ޑެންގީ ހުން މިހާރު ކޮންޓްރޯލްކުރެވިފައިވާ ކަމަށް ހއ އަތޮޅު ހޮސްޕިޓަލުން ބުނެފި އެވެ.

“ކުޅުދުއްފުށި އޮންލައިނަށް” މައުލޫމާތު ދެއްވަމުން ހއ. އަތޮޅު ހޮސްޕިޓަލުގެ މެނޭޖަރު މުހައްމަދު ހަސަން ވިދާޅުވީ އެއަތޮޅުން ޑެންގީހުމުގެ ކޭސްތައް ފެނިފައިވަނީ ދިއްދޫ އާއި އިހަވަންދޫ ކަމަށެވެ. އެހެންނަމަވެސް މިވަގުތު ޑެންގީ ހުން ކޮންޓްރޯލްކުރެވިފައިވާކަމަށް އޭނާ ވިދާޅުވި އެވެ.

މުހައްމަދު ހަސަން ވިދާޅުވީ ޑެންގީ ހުން ފެތުރެން ފެށުމުން މަދިރި މަދުކުރުމުގެ ޕްރޮގުރާމްތައް ދިއްދޫގައި އާއި އިހަވަންދޫގައި ކުރިއަށްގެންދިޔަ ކަމަށާއި މިވަގުތު ހޮސްޕިޓަލުގައި ފަރުވާދެމުން ދަނީ ޑެންގީހުން ޖެހިފައިވާ އެންމެ މީހަކަށް ކަމަށެވެ. އަދި އެމީހާގެ ހާލުވެސް ރަނގަޅުވަމުން އަންނަ ކަމަށް މުހައްމަދު ވިދާޅުވި އެެވެ.

މިމަހުގެ 7 ވަނަ ދުވަހާ ހަމައަށް އިހަވަންދޫއިން ޑެންގީހުމުގެ 13 ކޭސްއެއް ރިޕޯޓްކޮށްފައިވާއިރު މިމަހު 2 ވަނަ ދުވަހާ ހަމައަށް ދިއްދޫއިންވެސް ޑެންގީގެ ކޭސްތަކެއް ރިޕޯޓްކޮށްފައިވާ ކަމަށް އޭނާ ވިދާޅުވި އެވެ.