ރައީސް ތިލަދުންމައްޗަށް ވަޑައިގަންނަވާއިރު ވައުދުވި ގިނަ ޕްރޮޖެކްޓްތަކެއް ނުފެށޭ

ރާއްޖޭގައި މިހާތަނަށް ވެރިކަން ކުރެއްވި ރައީސުންގެ ތެރޭގައި ތިލަދުންމައްޗަށް އެންމެ ދުރު ރައީސަކީ ރައީސް އަބުދުލްﷲ ޔާމީން އަބުދުލް ގައްޔޫމްކަން ގިނަ ބަޔަކު ގަބޫލުކުރާނެ އެވެ.

ރައީސް ޔާމިންގެ ވެރިކަމުގެ 2 އަހަރާއި ބައިވެގެންދާއިރު ރާއްޖޭގެ އެންމެ އާބާދީ ބޮޑު ތިލަދުންމައްޗަށް ރައީސް ޔާމީނަށް ވަޑައިގަނެވުނީ އަދި އެންމެ ފަހަރަކު އެވެ. އެކަމަކު މާދަމާ އެމަނިކުފާނު ތިލަދުންމަތީގެ ރަށަކަށް ވަޑައިގަންނަވާ ގޮތަށް ވަނީ ހަމަޖެހިފަ އެވެ.

ހޯރަފުށީގެ 2 މަޝްރޫއުއެއް ފެއްޓެވުމަށް ރައީސް މާދަމާ އެރަށަށް ވަޑައިގަންނާވާއިރު ތިލަދުންމައްޗަށް ރައީސް ޔާމީން ވެފައިވާ އިހްމާލު ވަރަށްވެސް ބޮޑެވެ އެވެ. އިހްމާލުގެ ބައެއް ކަންތައް ހިމަނާލެވޭތޯ ބަލާލާނަމެވެ.

ރައީސް ޔާމީންގެ ރިޔާސީ ކެމްޕެއިންގައި ތިލަދުންމައްޗަށް ވެފައިވާ ވައުދުތަކުގެ ތެރޭގައި އެންމެ ގިނަ މީހުންގެ ވިންދާ ގުޅިފައިވާ 3 މަޝްރޫއުއަކީ އައިހެވަން މަޝްރޫއު އާއި ކުޅުދުއްފުށީ އެއާޕޯޓް އަދި ހދ އަށް ޓޫރިޒަމް ތައާރަފްކުރުމުގެ ވައުދެވެ.

މި ތިން މަޝްރޫއުއަކީ ވެސް ތިލަދުންމަތީގެ ރައްޔިތުންގެ ވިންދާ ގުޅިފައިވާ ކަމަކަށްވީ ނަމަވެސް މިހާ ހިސާބަށް އައިރުވެސް ހިތާމައަކީ އެއްވެސް މަޝްރޫއުއެއް ކުރެވެމުންދާތަން ނުފެނުމެވެ. މި މަޝްރޫއުތައް ވެފައިވަނީ ހަމައެކަނި ޖަލްސާތަކުގައި ހިތްއުފާކޮށްލައި މަސަލަސްކޮށްލަން ދެކެވޭ ވާހަކަތަކަކަށް ވެފައިވެ އެވެ.

ސަރަހައްދީ ގޮތުން އެކަށިގެންވާ ވަޒީފާތަކެއް ނެތެ. އިޖްތިމާއި ހާލަތާއި އިގްސޯދީ ހާލަތުވެސް ހަމަ އެހާމެ ދަށެވެ. އަދި ދަންނަ އެވެ. ސިއްހީ ހާލަތުވަނީ ތިލަދުންމަތީގައި ބޮއްސުން ލާފަ އެވެ. އެކަށޭނެ ތައުލީމެއް ނެތެެވެ. ތިލަދުންމަތީގައި ކުރީގެ ސަރުކާރުތަކުން ފަށާފައިވާ ތަރައްގީގެ މަޝްރޫއުތައް ވަނީ ހުއްޓިފަ އެވެ.

ހަނިމާދޫ އެއާޕޯޓް ހަގީގީ އިންޓަނޭޝަން އެއާޕޯޓެއްގެ ގޮތުގައި ތަރައްގީކުރަން މަނިކުފާނު ވެވަޑައިގަން ވައުދުގެ މަތިންވެސް މިއަދު ހަނދާނެތް ކަހަލަ އެވެ. ވިއްސާރަ މޫސުމުގައި ކުޅުދުއްފުއްޓާއި ދިއްދޫގެ މަގުތަކުގައި އެތަނުން އަނެއްތަނަށް ރައްޔިތުން މީހާ ދާން ޖެހެނީ ފަތާފަ އެވެ. ވާރޭ ނުވެހެންޏާ ހަނަފަސް ސަހަރާތަކެކޭ ވެސް އެމަގުތައް އެއްފަދަ އެވެ.

ތިލަދުންމަތީގެ ރައްޔިތުންވެސް ދިރިއުޅެނީ ދައުލަތަށް ޓެކްސް ދައްކައިގެން ކަމުން ރާއްޖެގެ ތަރައްގީގެ މަޝްރޫއުތައް ވެސް ހިންގަ ޖެހޭނީ ހަމަހަމަކޮށެވެ.

އަނެއްކާވެސް ރައީސް ޔާމީންގެ އިތުރު ވައުދުތަކެއް ހޯރަފުށިގައި ބާއްވާ ޖަލްސާއިން އިވިގެންދާނެ ކަން ކަށަވަރެވެ. މި ވައުދުތަކަށް ރައްޔިތުން ކިހާވަރަކަށް އިތުބާރުކުރާނެ ބާއްވާ މިއީވެސް ހަމަ އުފެދޭ ސުވާލެކެވެ.

ތިލަދުންމަތީގެ ރައްޔިތުންގެ މަނިކުފާނަށް ނޫނެކޭ ބުނުމުގެ ކުރިން، މިސަހަރަހައްދުގެ ރައްޔިތުންނަށް ވެފައިވާ ވައުދުތައް ފުއްދަވާދެއްވާށެވެ.