ކިނބޫ ބިސްތަކެއް ކަމަށް ބެލެވޭ ބިސްތަކެއް ވައިކަރަދޫ ގޮނޑުދޮށުން ފެނިއްޖެ

ކިނބޫ ބިސްތަކެއް ކަމަށް ބެލެވޭ ބިސްތަކެއް ވައިކަރަދޫ ގޮނޑުދޮށުން ފެނިއްޖެ އެވެ.

“ކުޅުދުއްފުށި އޮންލައިނަށް” މައުލޫމާތު ދެއްވަމުން ވައިކަރަދޫ ކައުންސިލު މެމްބަރު އަހުމަދު ނަސީމް ވިދާޅުވީ ހިމަ ދިގުކޮށް ހުރި މި ބިސްތައް ފެނިފައިވަނީ އެރަށު ކަނޑޫފަލާއި ދިމާ ގޮނޑުދޮށުން ދެފަސް ބެދުނު ހިސާބުން ފޫޓެއްހާ އަޑީގައި ވަޅުލާފައި ހުއްޓާކަމަށެވެ.

އެބިސް ވަޅުގަނޑުން ފަސް ބިސް ފެނިފައިވާއިރު ބިހެއް ދިގުމިނުގައި ގާގަނޑަކަށް 3 އިންޗި އާއި 4 އިންޗި އާއި ދެމެދު ހުންނާނެ ކަމަށް ނަސީމް ވިދާޅުވި އެވެ. އަދި ބިހެއްގެ ތެރޭގައި 3 ނުވަތަ 4 ގޮބޮޅިގަނޑު ހުރިއިރު ބޮޑަށް ލަފާކުރެވެނީ ކިނބޫ ބިސްތަކެއް ކަމަށް ނަސީމް ވިދާޅުވި އެވެ.

ބިސްތައް ފެނުން ކުދިންނާ ހަވާލާ ދެއްވައި ނަސީމް ވިދާޅުވީ ބިސްތައް ވަޅުލައިފަ ހުރި ދިމާލުން މޫދަށް އެއްޗެއް ފައިބައިގެން ގޮސްފައިވާ ފިޔަވަޅު ހުރިކަމަށާއި އެފިޔަވަޅު އިންސާނެއް އަތްތިލައަށް ވުރެ ބޮޑުވާނެ ކަމަށެވެ.