ރައީސް ޔާމީނަށް މަރުހަބާ ދެންނެވުމަށް ހޯރަފުށި ތައްޔާރުވަނީ

ރައީސުލްޖުމްހޫރިއްޔާ އަބްދުﷲ ޔާމީނު މާދަމާ ހޯރަފުއްޓަށް ވަޑައިގަތުމަށް ހަމަޖެހިފައިވާތީ އެމަނިކުފާނަށް މަރުހަބާ ދެންނެވުމަށް އެރަށުން ބޮޑެތި ތައްޔާރީތަކެއް ވަމުން އެބަ ދެއެވެ.

މާދަމާ ހެނދުނު ރައީސް އެރަށަށް ވަޑައިގަންނަވާ ގޮތަށް ހަމަޖެހިފައިވާއިރު އެމަނިކުފާނަށް މަރުހަބާ ދެންނެވުމަށް ބަނދަރު ސަރަހައްދު ވަނީ ވަރަށް ބޮޑަށް ފިޔާތޮށި ކުލައިން ޒީނަތްތެރިކޮށްފަ އެވެ.

ރައީސް މާދަމާ ހޯރަފުއްޓަށް ވަޑައިގަތުމަށް ހަމަޖެހިފައިވަނީ ނަރުދަމާ ނިޒާމްގެ މަސައްކަތް ރަސްމީކޮށް ހުޅުވުމަށާއި އެރަށު ގޮނޑުދޮށް ހިމާޔަތް ކުރުމުގެ މަސައްކަތް އިފްތިތާހު ކޮށްދެއްވުމަށެވެ.

ރައީސް ދާދި ފަހުން ވަނީ ހޯރަފުށިގައި އެއާޕޯޓެއް އަޅުވައިދެއްވާނެ ކަމަށް ވެސް ވިދާޅުވެފަ އެވެ.

މިދިޔަ ހަފްތާ ރައީސް އެރަށަށް ވަޑައިގަތުމަށް ހަމަޖެހުނު ނަމަވެސް މޫސުމް ގޯސްވުމުން އެއިރު ދަތުރުފުޅު ވަނީ ފަސްކުރައްވާފަ އެވެ. މިއީ ރައީސް ޔާމީންގެ ވެރިކަމުގައި އެމަނިކުފާނު ހޯރަފުއްޓަށް ވަޑައިގަންނަވާ 2 ވަނަ ފަހަރެވެ.