ހޯރަފުށީ ނަރުދަމާގެ ހިދުމަތް ރައީސް އިފްތިތާހްކޮށްދެއްވައިފި

ހއ ހޯރަފުށީ ނަރުދަމާގެ މަސައްކަތް ނިމުން ފާހަގަކޮށް އެކަން ރައީސް އަބުދުﷲ ޔާމީން އަބުދުލް ގައްޔޫމު މިއަދު ރަސްމީކޮށް  އިފްތިތާހްކޮށްދެއްވައިފި އެވެ.

ރައީސުލްޖުމްހޫރިއްޔާ ހޯރަފުށީގެ ނަރުދަމާ ނިޒާމް އިފްތިތާހް ކޮށްދެއްވީ އެ ރަށުގައި މިއަދު ބޭއްވި ހާއްސަ ރަސްމިއްޔާތެއްގައެވެ.

ތިން ހާހަށްވުރެ ގިނަ މީހުންގެ އާބާދީއެއް ދިރިއުޅޭ ހޯރަފުށީގައި ޤާއިމްކުރެއްވި ނަރުދަމާ ނިޒާމްގެ ޚިދުމަތް  670 އަށްވުރެ ގިނަ ގެއާ ވަނީ ގުޅާލެވިފައެވެ.

ހޯރަފުށީގައި ނަރުދަމާ ނިޒާމް ޤާއިމްކުރައްވާފައިވަނީ ދައުލަތުގެ ބަޖެޓުން 77 މިލިއަން ރުފިޔާ ހަރަދުކޮށްގެންގެންނެވެ. މިނިޒާމްގެ ތެރެއިން 670 އަށްވުރެ ގިނަ ގޭބިސީތަކަށް ވަނ ީ މި ހިދުމަތް ގުޅާލާފަ އެވެ.

މި ނިޒާމްގެ ތެރެއިން ހޯރަފުށީގައި 4 ޕަމްޕު ސްޓޭޝަން ގާއިމްކޮށް،  14.94 ކިލޯމީޓަރުގެ ނަރުދަމާގެ ވިއުގަޔެއް  ވަނީ ޤާއިމްކޮށްފަ އެވެ.

ނަޖިސް ބޭރުކުރުމަށްޓަކައި ރަށުގެ އެއްގަމު ތޮށިން ފެށިގެން  256 މީޓަރުގެ ދުރު ރާސްތާއަކަށް ސީ އައުޓްފޯލް ހޮޅި އަޅާފައިވާކަމަށް އެންވަޔަރަމެންޓް މިނިސްޓްރީން މައުލޫމާތު ދެއެވެ.

2014 ވަނަ އަހަރު މި މަޝްރޫއު ފައްޓަވައިދެއްވީ ވެސް ރައީސް ޔާމީނެވެ.