އައިހެވަން ހެދުމަށް ބިން ހިއްކުމުގެ އަމަލީ މަަސައްކަތް މިއަހަރު ފަށާނަން: ރައީސް

އިހަވަންދިއްޕޮޅުގައި ތަރައްގީ ކުރާ ވިޔަފާރި ބަނދަރު އައިހެވަންގެ މަސައްކަތް ފެށުމުގެ ގޮތުން ބިންހިއްކުމުގެ މަސައްކަތް މި އަހަރު ތެރޭގައި ފަށާނެ ކަމަށް ރައީސުލް ޖުމްހޫރިއްޔާ އަބްދުﷲ ޔާމީން ވިދާޅުވެއްޖެ އެވެ.

ހޯރަފުށީގައި ވާހަކަ ދައްކަވަމުން ރައީސް މިއަދު ވިދާޅުވީ އައިވެންގެ މަޝްރޫއުގެ ވާހަކަ އަޑުނީވެނީ އެ މަޝްރޫއު ސަރުކާރުން ހުއްޓާލަފައިވާތީ ނޫން ކަމަށާއި އެމަޝްރޫއު ލަސްވެގެންދަނީ ބައެއް ކަންކަން ހަމަނުހިގެން ކަމަށެވެ.

ރައީސް ވިދާޅުވީ އައިހެވަން މަސައްކަތުގެ ބިން ހިއްކުން ލަސްވެގެން އުޅެނީ ބިން ހިއްކުމަށް ބޭރުގެ ފަރާތަކަށް ނުދީ އެމްޓީސީސީއަށް އެ ގާބިލްކަން ހޯދައިދީގެން އެކަން ކުރުމަށް ކަމަށެވެ.

“އައިހެވަންގެ މަސްރޫއާއި ދޭތެރޭ އަޅުގަނޑު ކުރާ އުންމީދު ތަކުގެ ވާހަކަ ދަންނަވާލާނަން. މި މަޝްރޫއު އިރާދަކުރެއްވިއްޔާ ހަގީގަތަކަށް ވާނެ މި މަޝްރޫއުގެ  އަމަލީ މަސައްކަތް އަމަލީ މަސައްކަތް، ބިން ހިއްކުމުގެ މަސައްކަތް އިރާދަކުރެއްވިއްޔާ އަޅުގަނޑުމެން މި އަހަރުގެ ތެރޭގައި ފަށާނަން. މި އަހަރު ހުސްވުމުގެ ކުރިން އަޅުގަނޑުމެން ފަށާނަން” ރައީސް ވިދާޅުވި އެވެ.

ރައީސް ވިދާޅުވީ އައިހެވަން މަޝްރޫއަށް  4.5 ބިލިއަނަށް ވުރެ ކުޑަ ނޫން މަޝްރޫއެއް ކަމަށާއި އެއްފަހަރާ ބޮޑެތި ގިނަ މަޝްރޫއުތަކެއް ހިންގުމަކީ އެއްވެސް ސަރުކާރަކަށް ފަސޭހަ ވާނޭ ކަމެއް ނޫން ކަމަށެވެ.

އަދި އެމްޓީސީސީއިން  ގެންނަ ޑްރެޖަރުން ފުރަތަމަ  ކުރާ މަސައްކަތްތަކުގެ ތެރޭގައި އައިހެވަންގެ ބިން ހިއްކުން ހިމެނުމަށް މަސައްކަތް ކުރައްވަމުން ގެންދަވާ ކަމަށެވެ.