އެއާޕޯޓް ލަސްވުމާ ބެހޭ ގޮތުން ރައީސް ދެއްކެވި ވާހަކަފުޅު ދޮގުކުރައްވައި ކައުންސިލުން ނޫސް ބަޔާނެއް ނެރެފި

ކުޅުދުއްފުށީ އެއާޕޯޓް ލަސްވެގެން ދިޔައީ ކުޅުދުއްފުށީ ރައްޔިތުންނާއި ކައުންސިލުގެ ތެެރޭގައި އުފެދުނު ނުތަނަވަސް ކަމެއްގެ ތެރެއިން ކަމަށް ރައީސުލް ޖުމްހޫރިއްޔާ ވިދާޅުވެފައިވަނީ އެއާޕޯޓްގެ މަޝްރޫއުގެ ވައުދު ފުއްދުމަށް ސަރުކާރުން ނުކުޅެދިފައިވާ މިންވަރު ވަންހަނާ ކުރެއްވުން: ކައުންސިލް

 

ކުޅުުދުއްފުށީގައި އެއާޕޯޓް އެޅުން ލަސްވެގެން ދިޔައީ ކައުންސިލް ތެރޭގައި އުފެދުނު ނުތަނަވަސް ކަމެއްގެ ތެރެއިން ކަމަށް ރައީސުލް ޖުމްހޫރިއްޔާ އަބުދުﷲ ޔާމީން އިއްޔެ ހޯރަފުށީގައި ވާހަކަ ދައްކަވަމުން ވިދާޅުވެފައިވާތީ އެކަން ދޮގުކޮށް ކުޅުދުއްފުށީ ކައުންސިލުން ނޫސްބަޔާނެއް ނެރެފި އެވެ.

ކައުންސިލުގައި ތިއްބަވައި 7 މެމްބަރުން ސޮއިކޮށް ދާދި ދެންމެއަކު ނެރުނު ނޫސް ބަޔާނުގައި ބުނެފައިވަނީ ކުުޅުދުއްފުށީގައި އެއާޕޯޓް އެޅުމަށް ކައުންސިލުން ބޮޑެތި މަސައްކަތެއް ކޮށްފައިވަނިކޮށް އެމަޝްރޫއު ލަސްވެގެން ދިޔައީ ކުޅުދުއްފުށީ ރައްޔިތުންނާއި ކައުންސިލުގެ ތެެރޭގައި އުފެދުނު ނުތަނަވަސް ކަމެއްގެ ތެރެއިން ކަމަށް ރައީސުލް ޖުމްހޫރިއްޔާ ވިދާޅުވެފައިވަނީ އެއާޕޯޓްގެ މަޝްރޫއު ވައުދު ފުއްދުމަށް ސަރުކާރުން ނުކުޅެދިފައިވާ މިންވަރު ވަންހަނާ ކުރުން ކަމަށެވެ.

ކުޅުދުއްފުށީ އެއާޕޯޓް މަޝްރޫއުއަކީ ރައީސް ޔާމީންގެ ރިޔާސީ ވައުދަކަށް ވާތީ  އެވައުދު ފުއްދުމަށް ކައުންސިލުން މިހާތަނަށް ވަރަށް ގިނަ މަސައްކަތް ކޮށްފައިވާނެ ކަމަށެވެ. އެގޮތުން  2015 ވަނަ އަހަރު އެއާޕޯޓް އަޅައި ސަރަހައްދުގެ ގެތަކުގެ ތަފްސީލް ރީޖަނަލް އެއާޕޯޓްސް ފޮނުވާފައިވާކަށާއި އަދި ހަމަ ކުޅިން އެއާޕޯޓް އަޅައި ސަރަހައްދަށް އަރާ ހިސާބުތަކުގެ ޕްލެރިމިނަރީސް ޑެޕްތް ސަރވޭ ހެދުމަށްފަހު ބިންގަނޑުން ނެގުނު ސާމްޕަލުވެސް ރީޖަނަލްސް އެއާޕޯޓަށް ހަމަ އެއަހަރު ފޮނުވި ކަމަށް ނޫސް ބަޔާނުގައި ވެ އެވެ.

އަދި މީގެ އިތުރުން ވެސް އެއާޕޯޓް އަޅާ ސަރަހައްދު ކޮންޓްރެކްޓަރާއި ހަވާލުކުރުުމުގެ ކުރިން އެސަރަހައްދުގައި ހުރި ރުއްގަހާއި މީހުންގެ ބޮނބި ފާތަކަށް ބަދަލުދިނުމުގެ މައްސަލަ ނުވަތަ އެއްތަކެއްޗާމެދު ނިންމާވާ ގޮތެއް އެންގުމަށް އެދި 2015 އަހަރު ފޮނުވި ސިޓީގެ ޖަވާބު އަދިވެސް ނުލިބޭކަން ކައުންސިލުން ފާހަގަކުރި އެވެ.

ރައީސް ޔާމީން ވެރިކަމަށް ވަޑައިގެން 2014 ވަނަ އަހަރު ކުޅުދުއްފުއްޓަށް ވަޑައިގެން ނެވި ދަތުރުފުޅެއްގައި ކުޅުދުއްފުށީ ރައްޔިތުން ބޭނުންވާ ކަންކަމުގެ ތަފްސީލް ހިމެނޭ ސިޓީއެއް ސީދާ ރައީސް އަތްފުޅަށް އަރުވާފައިވާނޭ ކަމަށާއި އެސިޓީގައި އެންމެ ފުރަތަމަވެސް އިންނާނީ ކުޅުދުއްފުށީގައި އެއާޕޯޓް އެޅުމުގެ ވާހަކަކަން ބަޔާނުގައި ވެ އެވެ.

ކުޅުދުއްފުށީ ތަރައްގީއަށް ސަރުކާރުން ބޭނުންވާ ބައެއް މަސްރޫއުތައް މަޑުޖެހެމުންދާތީ، އެކަމާ ގުޅުންހުރި ވުޒާރާތަކުގެ ވަޒީރުންނާއި ބައްދަލުކުރެއްވުމަށް ކައުންސިލުގެ ވަފުދެއް މިއަހަރުގެ އޭޕްރީލްމަހުގެ ތެރޭގައި މާލެ ދާން ނިންމާ، މިނިސްޓްރީތަކުގެ އިސްވެރިނާ ބައްދަލުކުރެވޭނެ ގޮތް ހައްދަވައިދެއްވުމަށް އެދި ސަރުކާރުގެ ހުރިހާ މިނިސްޓްރީތަކުގައި އެދިފައިވީ  ނަމަވެސް އިސްލާމިކް މިނިސްޓްރީ އާއި ފިޝަރީޒް މިނިސްޓްރީ ފިޔަވާ އެހެން އެއްވެސް މިނިސްޓްރީއެއްގެ ސިޓީ އަދި އަދަށްދާން ދެން ވެސް ނުލިބޭކަމަށްް ހިތާމަޔާއެކު ނޫސްބަޔާނުގައި ފާހަގަކޮށްފައިވެ އެވެ.

ނޫސްބަޔާން ނިންމާލަމުން ބުނެފައިވަނީ ކުޅުދުއްފުށީގެ ތަރައްގީއަށް ވާންޖެހުނު ކޮންމެ ޤުރުބާނެއްވެސް ވަމުންދާނެ ކަމުގެ ޔަގީންކަން ކުޅުދުއްފުށީ ރައްޔިތުންނަށް އަރުވާ ކަމަށެވެ.