ހޯރަފުށީ ސިއްހީ މަރުކަޒު އަތޮޅު ހޮސްޕިޓަލަކަށް ބަދަލުކުރުމުގެ މަސައްކަތް ދަނީ ކުރެވެމުން: ކައުންސިލް

ހއ ހޯރަފުށީގައި ހުންނަ ސިއްހީ މަރުކަޒުގެ ހިދުމަތް ފުޅާކޮށް އަތޮޅު ހޮސްޕިޓަލެއްގެ ފެންވަރަށް ބަދަލުކުރުމުގެ މަސައްކަތް ފަށާފައިވާ ކަމަށް ހޯރަފުށީ ކައުންސިލްގެ ރައީސް އަލީ އާރިފް ވިދާޅުވެއްޖެ އެވެ.

އެރަށު ނަރުދަމާ އިފްތިތާހްކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން އަަލީ އާރިފް ވިދާޅުވީ ވެރިރަށާއި ދުރުވުމުން ސިއްހީ ހިދުމަތް ހޯދުމަށް ދަތިވާ ކަމަށާއި މިހާރަށް ރަށުގެ ރައްޔިތުންނަށާއި ދާއިރާގެ ރައްޔިތުންނަށް އެންމެ މުހިއްމު އެއް އަސާސީ ހިދުމަތަކީ ރަށުން ރަނގަޅު ސިއްހީ ހިދުމަތް ލިބުންކަމަށެވެ.

” އިއްޒަތްތެރި ރައީސްގެ ވާގިފުޅާއި އެހީތެރިކަމާއެކީ އަޅުގަނޑުމެން މިރަށުގެ ސިއްހީ މަރުކަޒު އަތޮޅު ހޮސްޕިޓަލުގެ ފެންވަރަށް ބަދަލުކުރާ ނަން. ބަދަލުކޮށްފައި މަސައްކަތް ނިންމާނީ ” އަލީ ވިދާޅުވި އެވެ.

ރައީސް ޔާމީނާ ހެޔޮއެދިލައްވާ ބައެއް ފަރާތްތަކާއި ސަރުކާރުގެ އެހީތެރިކަމާއެކު އެކަން ކުރުމަށް ކައުންސިލުން އިސްނަގައިގެން މިސްރާބެއް ޖަހާފައިވާ ކަމަށް އަލީ ވިދާޅުވި އެވެ.

އަލީ ވިދާޅުވީ ހޯރަފުށީ ސިއްހީ މަރުކަޒު އަތޮޅު ހޮސްޕިޓަލަކަށް ގެނައުމަށްޓަކާއި ސަރުކާރާ ގުޅިގެން އެކަށިގަނޑެއް ސިފައިގައި މަސައްކަތް ކުރަމުން އަންނަކަމަށާއި މިއަދުވެސް ވަނީ އެކަމުގެ މަރުހަލާތަކެއް ކަނޑަތުކޮށްފައި ކަމަށް އޭނާ ވިދާޅުވި އެވެ.