ށ އަތޮޅު ހޮސްޕިޓަލުގައި ތެލެސީމިއާ އަށް ސްކްރީން ކުރުމުގެ ހިދުމަތް ފަށައިފި

ތެލެސީމިއާ އަށް ސްކްރީން ކުރުމުގެ ހިދުމަތް ށ އަތޮޅު ހޮސްޕިޓަލުގައި އިފްތިތާހްކޮށްފި އެވެ.

ށ ފުނަދޫ އަތޮޅު ހޮސްޕިޓަލުގައި ރޭ ބޭއްވި ރަސްމިއްޔާތެއްގައި މިހިދުމަތް ފައްޓަވައިދެއްވީ ށ އަތޮޅު ކައުންސިލް ރައީސް މުހައްމަދު އަރީފެވެ.

މިހިދުމަތް ފެށުމާއެކު މާލެ ނުގޮސް ތެލެސީމިއާއަށް ސްކްރީންކުރުމުގެ ހިދުމަތް އަތޮޅުން ލިބިގެންދާނެ އެވެ.

ށ އަތޮޅު ހޮސްޕިޓަލުގެ މެނޭޖަރު މުހައްމަދު ހުޝާމް ވިދާޅުވީ ތެލެސީމިއާއަށް ސްކްރީން ކުރުމަށް ހަމަޖެހިފައިވަނީ ކޮންމެ ހަފްތާއަކު އާދިއްތަ ދުވަހު ކަމަށާއި އެދުވަހު ގިނަވެގެން 30 ކުދިން ސްކްރީން ކުރެވޭނެ ކަމަށެވެ.

ހުޝާމް ވިދާޅުވީ ސްކްރީންކުރުމަށް ފަހު ބަންދު ދުވަސްތަކާ ނުލައި 3 ދުވަސް ތެރޭގައި ކާޑު ލިބިގެންދާނެ ކަމަށެވެ.

މައުލޫމާތު ލިބިފައިވާގޮތުގައި މިއީ އަތޮޅު ތެރޭގައި މިހިދުމަތް ދޭން ފެށި 3 ވަނަ ހޮސްޕިޓަލެވެ.