މިއަހަރުވެސް އޯލެވެލްގައި ދަރިވަރުން ބޭނުންވާ މާއްދާތައް ހެދުމުގެ ފުރުސަތު އެބައޮތް: އެޑިއުކޭޝަން

އެހެން އަހަރުތަކާ އެއްގޮތަށް މިއަހަރުވެސް ޖީސީއީ އޯލެވެލްގައި އެދަރިވަރަކު ބޭނުންވާ މާއްދާތަކުގެ އިމްތިހާނު ހެދޭނެ ކަމަށް އެޑިއުކޭޝަން މިނިސްޓްރީން ބުނެފި އެވެ.

އެޑިއުކޭޝަން މިނިސްޓްރީން މިހެން ބުނެފައިމިވަނީ މިއަހަރުގެ އޯލެވެލް އިމްތިހާނުގެ މާއްދާތަކުގައި ބައިވެރިވެވޭނީ ގުރޭޑް 9 ގެ ފަހު ޓާމާއި 10 ގެ ފުރަތަމަ ޓާރމުގެ ފާސްވާ މާއްދާއަކުން އެކަނި ކަމަށް ދެކެވޭ ވާހަކަ ދޮގުކޮށް، މިނޫހަށް ދިން އިންޓަވިއުގަ އެވެ.

އެޑިއުކޭޝަން މިނިސްޓްރީގެ ސީނިއާ ޕޮލިސީ އެގްޒެކްޓިވް އޮފިސަރ ޝެރީނާ އަބުދުލް ސަމަދު ވިދާޅުވީ އެއްވެސް ދަރިވަރަކަށް އޯލެވެލްގައި ވަކި މާއްދާތަކެއް ހެދުމަށް މިނިސްޓްރީން މަޖުބޫރު ނުކުރާ ކަމަށެވެ. އެކުއްޖަކު ބޭނުންވާ މާއްދާތަކެއް އޯލެވެލްގައި މިއަހަރުވެސް ހެދޭނެ ކަމަށެވެ.

ޝެރީނާ ވިދާޅުވީ ކޮންމެ ދަރިވަރެއްގެ ވެސް ގުރޭޑް 8 ، 9 ނަތީޖާއާއި ގުރޭޑް 10 ގައި ލިބޭނެ ކަމަށް ލަފާކުރާ ނަތީޖާ ބަލާފައި ދަރިވަރަކަށް އެންމެ ރަނގަޅު ގޮތަކީ ކޮބާތޯ ބަލާ ސްކޫލުތަކުން ދަރިވަރުންނާއި ބެލެނިވެރިންނާ ވާހަކަދައްކަވަމުން އަންނަ ކަމަށެވެ.

އެޑިއުކޭޝަންގެ ޓާގެޓަކީ މިއަހަރު ނިންމާފައި ނިކުންނަ ކޮންމެ ކުއްޖަކީ ލެވެލް 4 ގެ ސެޓްފިކެޓް ހަދަން އެކްރެޑިޓޭޝަން އެކުއްޖައަށް ހޯދައި ދިނުންކަމަށާއި އޭރުން އަންނަ އަހަރު އެކުދިންނަށް ފުރުސަތުތައް ހޯދައިދޭނެ ކަމަށް އޭނާ ވިދާޅުވި އެވެ.

ސްކޫލުތަކުން ނުކުންނަ ކޮންމެ ކުއްޖަކީ އެންމެ މަދުން 3 މާއްދާއިން ފާސްވެފައިވާ ހުރި ކުއްޖަކަށް ހަދަން މިނިސްޓްރީން ވާނީ އަންގާފަ އެވެ. ސްކޫލުތަކުން އެސްކޫލެއްގެ ދަރިވަރުންގެ ނަތީޖާތަކަށް ބަލާފައި އެކުއްޖަކަށް ހެދިދާނެ އެންމެ ރަނގަޅު ޗޮއިސްއަކީ ކޮބާކަން ދަރިވަރުންނާއި ބެލެވިވެރިންނަށް ކިޔާދޭނެ ކަމަށް އޭނާ ވިދާޅުވި އެވެ.

އެގޮތަށް ކަންތައް ކުރަނީ ގިނަ ފަހަރު ދަރިވަރުން 8 މާއްދާއާ އެކު އޯލެވަލް އާ ހަމައަށް އަންނައިރު ގިނަ މާއްދާތަކުން ފާސްނުވާ ކަމަށާއި އެކަމުގެ ސަބަބުން ދަރިވަރުންގެ މުސްތަގުބަލަށް ނޭދޭވޭ އަސަރުކުރާ ކަމަށް ޝެރީނާ ފާހަގަކުރެއްވި އެވެ.

ގުރޭޑް 10 އަކާއި ހަމައަށް އަންނައިރު އޭގެ ކުރީ ދެއަހަރު ފާސްނުވާ މާއްދާތައް ދޫކޮށްލުމަށް ފަހު ބީޓެކް ނުވަތަ އެދަރިވަރެއްގެ ހުންނަ ސްކިލްއަކުން ކުރިއަށްދިއުމުގެ ފުރުސަތު ހުޅުވާލައިފައިވާކަމަށް އޭނާ ވިދާޅުވި އެވެ.

“މިސާލަކަށް އެކުއްޖާއަކީ އެކަޑަމިކް ތަންކޮޅެއް ވީކް ކުއްޖެއް ވިއްޔާ އެކަޑަމިކް ޕާޓުން އެކުއްޖާއަށް ގޮތެއް ނެތް ކަމަށް ވިޔަސް، ސްކިލް ނުވަތަ ވޮކޭޝަނަލް ޕާޓުން އެކުއްޖާއަށް ކުރިއަށް ގެންގޮސް ދިނުން.” ޝެރީނާ ވިދާޅުވި އެވެ.

ޝެރީނާ ވިދާޅުވީ މިއަހަރު ގުރޭޑް 10 ނިންމާފައި ނުކުންނަ ކޮންމެ ކުއްޖަކީ މިއަންނަ އަހަރު މަތީ ތައުލީމަށް ދިއުމަށް ކޮލިފިކޭޝަން ހުންނަ ދަރިވަރަކަށް ހެދުމަކީ މިނިސްޓްރީގެ ޓާގެޓެއް ކަމަށެވެ.

” ކޮންމެވެސް ލެވެލްއެއްގެ މާނައަކީ ލެވެލް 4 ސެޓްފިކެޓެއް ހަދަން. އެހެން ނޫނީ ބީޓެކް އޭ އެލެވް ހަދަން. އެހެން ނޫނީ ފަސް މާއްދާ ފާސްވެގެން ނޯމަލް ސްޓްރީމްގެ އޭ އެލެވް ހަދަން. އެހެން ނޫނީ އެކުއްޖާ މިވަގުތު ވަޒީފާއަކަށް ދާން ބޭނުން ނަމަ ބޭސިކް ވަޒީފާއަކަށް ދިއުމުގެ ކޮލިފިކޭޝަން އެކުއްޖާގެ ކިބައިގައި ހުންނަ ވަރު ކޮށްދިނުން. އެޓާގެޓަށް ރީޗްވުމުގެ ގޮތުން ސްކޫލްތަކުން ދަނީ ކުދިންނާ ވާހަކަދައްކަމުން.” ޝެރީނާ ވިދާޅުވި އެވެ.

އޭނާ ވިދާޅުވީ ފުރުސަތުތައް ކިޔާދީފައި ވިސްނާދީފައި އެކަމަކުވެސް ބޭނުން ނުވާ ކަމަށް ވަނީ ނަމަ ބެލެނިވެރިން ބޭނުން ގޮތަކަށް ހެދޭނެ ކަމަށެވެ. އެއީ ޔޫސެޓެއް ލިބުނުކަމުގައި ވީނަމަވެސް 8 މާއްދާ ހަދަން ބޭނުންވާ ކުދިންނަށް އެފުރުސަތު އޮތްކަމަށް އޭނާ ވިދާޅުވި އެވެ.