މަޢުހަދުއް ދިރާސާތިލް ގުރުއާނިއްޔާގެ ކެމްޕަހެއް ވައިކަރަދޫގައި ހުޅުވައިފި

މަޢުހަދުއް ދިރާސާތިލް ގުރުއާނިއްޔާގެ ކެމްޕަހެއް ވައިކަރަދޫގައި ހުޅުވައިފި އެވެ.

މިކަމަށްޓަކައި މިދިޔަ ހުކުރުދުވަހު ރޭ ވައިކަރަދޫގައި ބޭއްވި ޖަލްސާގައި މިކެމްޕަސް ހުޅުވައިދެއްވީ ވައިކަރަދޫ ގުރުއާން މުބާރާތް އެއްވަނަ ހޯދި ހުދާ އަބުދުﷲ ޖަލީލެވެ.

މި ރަސްމިއްޔާތުގައި މަޢުހަދުއް ދިރާސާތިލް ޤުރުއާނިއްޔާގެ ޑީން އާއީ ވައިސް ޑީން ބައިވެރިވެލެއްވި އެވެ.

ވައިކަރަދޫ ކައުންސިލުގެ ރައީސް އިބުރާހިމް މުހައްމަދު ވިދާޅުވީ މިކެމްޕަހުގައި ގުރުއާން ކިޔަވައިދިނުމުގެ އިތުރުން ގުރުއާނާ ބެހޭ ކޯސްތައް ހިންގުމަށް ހަމަޖެހިފައިވާ ކަމަށެވެ.

އެގޮތުން ގުރުއާން ޓީޗަރުން ތަމްރީން ކުރުމުގެ ކޯސްތައް ވެސް ކެމްޕަހުގައި ކުރިއަށްގެންދާނެ ކަމަށް އޭނާ ވިދާޅުވި އެވެ. އަދި ޑިޕޮލޮމާ ފެންވަރުގެ ގުރުއާނާ ބެހޭ އިތުރު ކޯސްތައް ވެސް ކުރިއަށްގެންދަން ހަމަޖެހިފައިވާ ކަމަށް އިބުރާހިމް ފާހަގަކުރެއްވި އެވެ.

މި ކެމްޕަހުގައި ހިންގާ ކޯސްތަކަކީ މޯލްޑިވްސް ކޮލިފިކޭޝަން އޮތޯރިޓީއިން ގަބޫލު ކުރާ ކޯސްތަކެއް ކަމަށް ކައުންސިލުން މައުލޫމާތު ދެއްވަ އެވެ.