ކުޅުދުއްފުށީ ބާޒާރުގައި ގިތެޔޮ މިރުސް މަދުވެ، މިރުސް ކިލޯއެއްގެ އަގު 600 ރުފިޔާއަށް އަރައިފި

ކުޅުދުއްފުށީ ބާޒާރުގައި ގިތެޔޮ މިރުސް މަދުވެ، މިރުސް ކިލޯއެއްގެ އަގު 600 ރުފިޔާއަށް އަރައިފި އެވެ. ރޯދަމަސް ފެށުމުގެ އެއްހަފްތާ ކުރިންވެސް ގިތެޔޮ މިރުހުގެ އަގު ކުޅުދުއްފުށީ ބާޒާރުގައި ހުރީ އާއްމުކޮށް ގަންނަ ލިބޭ އަގަށް ވުރެ ބޮޑުކޮށެވެ. އެއީ ކިލޯއެއް 300 ރުފިޔާ އާއި 500 ރުފިޔާ ދެމެދުގެ އަގެއްގަ އެވެ.

މިއަދު ކުޅުދުއްފުށީ ބާޒާރަށް ބަލާލާއިރު ގިނަ ފިހާރަތަކެއްގައި ގިތެޔޮ މިރުސް ހުރީ ހުސްވެފައި އެވެ. މިރުސް ގަންނަ ލިބެހުރި މަދު ފިހާރަތަކެއްގައި މިރުހުގެ އަގު ހުރީ ވަރަށް ބޮޑުވެފަ އެވެ.

އެގޮތުން ގިނަ ފިހާރަތަކެއްގައި ގިތެޔޮ މިރުސް ކިލޯއެއް ހުރީ 600 ރުފިޔާ އަށެވެ. ވަކި މިރުހެއް ހުރީ 5 ރުފިޔާ އާއި 10 ރުފިޔާގެ ދެމެދުގެ އަގުތަކެއްގައި އެވެ.

ވިޔަފާރިވެރިން ބުނީ މިރުހުގެ އަގު ބޮޑީ ދަނޑުވެރިން މިރުސް ވިއްކާ އަގު ބޮޑުވީމަ ކަމަށެވެ. އަދި ބޭނުންވާ ވަރަށް މިރުސް ދަނޑުވެރިންނަށް ސަޕްލައި ނުކޮށްދެވޭކަން ވިޔަފާރިވެރިން ފާހަގަކުރެއެވެ.