ކުޅުދުއްފުށީ އެއާޕޯޓް އަޅައި ސަރަހައްދުގެ އީއައިއޭ ހަދަން ފަށައިފި

ކުޅުދުއްފުށީ އެއާޕޯޓް އަޅާ ސަރަހައްދުގެ އެންވަޔަރަންމަންޓް އިމްޕެކްޓް އެސެސްމެންޓް (އީއައިއޭ) ހަދަން ފަށައިފި އެވެ.

ކުޅުދުއްފުށީގައި އެއާޕޯޓް އަޅަން އަދި ހަމަޖެހިފައިވަނީ އުތުރުކޮޅުގައި އޮންނަ ހިތްގައިމު މަށިކުޅި ހިއްކައިގެންނެވެ.

އެއާޕޯޓް ހެދުމުގެ ކުރިން ތިމާވެއްޓަށް ކުރާނެ އަސަރު ދެނެގަތުމަށް ހަދަން ޖެހޭ މި ސާވޭ ކުރަން ފަށާފައިވަނީ މި ހަފްތާ ތެރޭގައި އެވެ. މި ސާވޭ ހަދަނީ ސޭންޑް ކޭސް ފްރައިވެޓް ނަމަކަށް ކިޔާ ކުންފުންޏަކުންނެވެ.

“ކޭއޯ” އަށް މައުލޫމާތުދެއްވަމުން ކުޅުދުއްފުށީ ކައުންސިލުގެ ރައީސް ވިދާޅުވީ ކުޅުދުއްފުށީ އެއާޕޯޓް ހަދައި ސަރަހައްދުގެ އީއައިއޭ ހެދުމުގެ މަސައްކަތް ފެށިގެން ކުރިއަށްދާ ކަމަށެވެ.

އަލީ ވިދާޅުވީ ކުޅި ސަރަހައްދު ނޫން އެހެން ސަރަހައްދުތައް ވެސް އެފަރާތުން ބަލަމުން އަންނަކަމަށާއި އެގޮތުން އެއާޕޯޓެއް އެޅޭނެ ޖާގަ ރަށުގެ އިރުމަތީ ފަރާތުގައި އޮތް ތޯ ވެސް ބަލާފައިވާ ކަމަށެވެ.

ކުޅުދުއްފުށީ އެއާޕޯޓަކީ ރައީސް ޔާމީންގެ ރިޔާސީ ވައުދެކެވެ.