ކުޅުދުއްފުށީގައި ސްކޫލު ބަހުގެ ހިދުމަތް ދޭން ފަށަނީ

ކުޅުދުއްފުށީ ހިމެނޭ ގޮތަށް އާބާދީ ބޮޑެތި ބައެއް ރަށްތަކުގައ ސްކޫލު ބަހުގެ ހިދުމަތް ދިނުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީއާ) މިއަދު ހަވާލުކޮށްފި އެވެ.

އިކޮނޮމިކް މިނިސްޓްރީގައި މިއަދު އޮތް ރަސްމިއްޔާތެއްގައި މިނިސްޓްރީގެ ފަރާތުން މިއެއްބަސްވުމުގައި ސޮއިކުރެއްވީ މިނިސްޓަރު މުހައްމަދު ސައީދު އެވެ. އެމްޓީސީސީގެ ފަރާތުން އެއްބަސްވުމުގައި ސޮއިކުރެއްވީ އެކުންފުނީގެ ސީއީއޯ އިބްރާހިމް ޒިޔަތެވެ.

މިނިސްޓަރު ސައީދު ވިދާޅުވީ އެމްޓީސީސީއަށް ބަހުގެ ހިދުމަތް ދިނުމަށް ހުއްދަ ދިނީ ކުޅުދުއްފުށީގެ އިތުރުން މާލެ އާއި ގދ. ތިނަދޫ އާއި ލ. އަތޮޅުގައި ހިދުމަތް ދިނުމަށް ކަމަށެވެ. އެމްޓީސީސީން ބަހުގެ ހިދުމަތްދޭއިރު ސުކޫލު ކުދިންނަށް ހާއްސަކޮށްގެން ބަހުގެ ހިދުމަތް ދޭނެ ކަމަށްވެސް ވިދާޅުވި އެވެ.

އަދި މި ތިން ސަރަހައްދުގައި ވެސް 3 މަސް ދުވަހުގެ ތެރޭގައި ސްކޫލް ބަހުގެ ހިދުމަތް ދޭން ފަށާނެ ކަމަށް އިކޮނޮމިކް މިނިސްޓަރު ވިދާޅުވި އެވެ.