ތެރޭގެ އުދުހުންތަކުގެ ޑިމާންޑް ބޮޑުވެފައިވާ ކަމަށް މޯލްޑިވިއަންއިން ބުނެފި

ކުރިއަށް އޮތް ފިތުރު ޢީދާއި ދިމާކޮށް އެތެރޭގެ އުދުހުންތަކުގެ ޑިމާންޑް ބޮޑުވެފައިވާ ކަމަށް ގައުމީ އެއާލައިން މޯލްޑިވިއަން އިން ބުނެފި އެވެ.

މޯލްޑިވިއަން ހިންގާ އައިލެންޑް އޭވިއޭޝަން ސާވިސަސްގެ ހެޑް އޮފް އެޑްމިނިސްޓްރޭޝަން އަލީ ނަޝާތު ހަމީދު “މިހާރު” ނޫހަށް މައުލޫމާތު ދެއްވަމުން ވިދާޅުވީ އީދު ބަންދާ ދިމާކޮށް ޓިކެޓުތަކުގެ ޑިމާންޑަށް ބަލާފައި މަތިންދާބޯޓް އިތުރު ކުރުމަށް ވިސްނާކަމަށެވެ.

އެންމެ ޑިމާންޑް ބޮޑީ އާބާދީ ގިނަ ރަށްތަކަށް ކަމަށާއި އައްޑޫއާއި ގދ އަދި ގއ ފަދަ ރަށްތަކަށް ދަތުރުކުރާ ފްލައިޓްތައް ގާތްގަނޑަކަށް ފުލްވެފައި ހުރިކަމަށް ނަޝާތު ވިދާޅުވި ކަމަށް “މިހާރު” ގައި ރިޕޯޓް ކޮށްފައިވެއެވެ.

ނަޝާތު ވިދާޅުވި ގޮތުގައި އީދު ބަންދާ ދިމާކޮށް ހާއްސަ ފެއާ އަގުތަކެއް ކަނޑައެއް ނާޅަ އެވެ. އެގޮތުން ޓިކެޓުގެ އަގު ހުންނާނީ މިއަހަރު ފެށުނު އިރު އެ އެއާލައިނުން ކަނޑައާޅާފައި ވާ އަގުތަކުގައި ކަމަށް ނަޝާތު ވިދާޅުވި އެވެ.