ކުޅުދުއްފުށީގައި ބޮޑު ޖަމާއަތުގައި ފިތުރު އީދު ނަމާދުކުރުން ސްޓޭޑިއަމްގައި

ރަސޫލާގެ ސުންނަތާ އެގޮތަށް މިއަހަރުގެ ވެސް ފިތުރު އީދު ނަމާދު ކުޅުދުއްފުށީގައި ކުރުމަށް ހަމަޖެހިފައިވަނީ ބޮޑު ޖަމާއަތުގައި ސްޓޭޑިއަމްގައި ކަމަށް އެކަން އިންތިޒާމްކުރާ ފަރާތުން ބުނެފި އެވެ.

އެގޮތުން ކުޅުދުއްފުށީގައި ފިތުރު އީދު ނަމާދު ކުރުމަށް ހަމަޖެހިފައިވަނީ ސްޓޭޑިއަމްގައި އާއި ހުކުރު މިސްކިތުގައި އެކަންޏެވެ. ސްޓޭޑިއަމްގައި އީދު ނަމާދު އިމާމުވެ ކުރުމަށް ހަމަޖެހިފައިވަނީ ޔުނިއަން، ރޫހުލް އަމީން އަބުދުﷲ އެވެ. ހުކުރު މިސްކިތުގައި ޖަމާއަތުގައި އީދު ނަމާދުކުރުމަށް ހަމަޖެހިފައިވަނީ ދާރުސަލާމް،ހުސެއިން އަހުމަދެވެ.

މިކަމުގެ އިސްކޮށް އުޅޭ ފަރާތެއް ކަމަށްވާ ހުސެއިން އަލީ ކޭއޯ އަށް ވިދާޅުވީ މޫސުމް ތަންދޭނަމަ ބޮޑު ޖަމާއާތުގައި ސްޓޭޑިއަމްގައި އީދު ނަމާދު ކުރުން އޮންނާނެ ކަމަށެވެ. 6000 މީހުންނަށް ޖާގަ އެތަނުން ލިބޭނެ އެވެ.އަދި އީދު ނަމާދަށް ޕިކަޕްތަކުގައި ހިލޭ މީހުން ގެނައުމުގެ ހިދުމަތް ހަމަޖެހިފައިވާ ކަމަށް އޭނާ ބުންޏެވެ.

އެގޮތުން ޕިކަޕް މަޑުކުރާ ޕޮއިންޓްތައް އަމީނީމަގުގައި ފާހަގަކޮށްފައި ހުންނާނެ ކަމަށާއި ވެލިކަލްތަކުގައި ދާން ބޭނުންވާ ފަރާތްތަކުން އަމީނީމަގުގައި 6:15 އަށް އަމީނީމަގަށް ނިކުތުމަށް އެދޭ ކަމަށް އޭނާ ބުންޏެވެ. އަދި އަމީނީމަގު އިތުރުން ސްޓޭޑިއަމަށް މީހުން ގެނައުމަށްޓަކައި ކޮރަލް ދަނޑުގެ އިރުއުތުރު ކަންމަތީގައި 7:10 ގައި ޕިކަޕެއް އޮންނާނެ ކަމަށް ހުސެއިން ބުންޏެވެ.

އަންހެނުންނާއި ފިރިހެނުންނަށް ވަކިން ވަދެ ނިކުމެވާން ގޭޓުތަށް ހަމަޖައްސާއިރު ނަމާދުގައި ބައިވެރިނުވެވޭ އަންހެނުންނަށް ހުތުބާ އަޑު އެހުމުގެ ފުރުސަތު ހޯދައިދިނުމަށް ހާއްސަ އިންތިޒާމުތަކެއް ހަމަޖެއްސޭނެކަމުގައިވެސް އޭނާ ބުންޏެވެ.

މީގެ އިތުރުން ހުސެއިން ވިދާޅުވީ ބަލިމީހުންނަށާއި މުސްކުޅިންނަށް ހާއްސަކޮށް ގޮނޑި ބެހެއްޓިފައި ހުންނާނެ ކަމަށެވެ

އީދު ނަމާދަށް ފަހު ކުޑަކުދިންނަށް އީދު ހަދިޔާ ބެހުންވެސް ކުރިއަށްދާނެ ކަމަށް އެފަރާތުން މައުލޫމާތު ދެ އެވެ.

ކައުންސިލުން ބުނީ މޫސުމް ގޯވެ، ސްޓޭޑިއަމްގައި އީދު ނަމާދު ނުކުރޭވޭ ހާލަތަށް ގޮސްފި ނަމަ ހުކުރުކުރާ ހުރިހާ މިސްކިތްތަކެއްގައި އީދު ނަމާދު ކުރާނެ ކަމަށެވެ.