ދިރާގުން ރާއްޖޭގެ ގިނަ ސަރަހައްދުތަކެއްގައި އީދު ހަދިޔާ ބަހައިފި

ފިތުުރު އީދުގެ މުނާސަބަތުގައި ދިރާގުގެ ފަރާތުން މާލެއާއި ރާއްޖޭގެ އެކި ސަރަހައްދުތަކުގައި ހަދިޔާ ބަހައިފި އެވެ.

އީދުގެ މުނާސަބަތު ފާހަގަ ކުރުމުގެ ގޮތުން ހަދިޔާ ބެހުމުގެ ހަރަކާތް ކުރިއަށް ގެންގޮސްފައިވަނީ މާލޭގެ އިތުރުން ދިރާގުގެ ރީޖަނަލް އޮޕަރޭޝަން ސެންޓަރުތަށް ގާއިމްކޮށްފައިވާ 8 އަތޮޅެއްގަ އެވެ. އެގޮތުން އީދުގެ އުފާ ފާހަގަކުރުމުގެ ގޮތުން ކުޑަކުދިން ޖަމާވާ އެކި ސަރަހައްދުތަކުގައި އީދު ނަމާދުގެ ފަހުގައި ވަނީ ހަދިޔާ ބަހާފައެވެ.

އެގޮތުން އިއްޔެ ހަވީރު ފެށިގެން ކުޅުދުއްފުށީ އަމީނީ މަގު ގައި ހަދިޔާ ބަހާފައިވާ އިރު ހަމަ އެގަޑީގައި ގއ. ގައްދޫ މައިމަގުގައި، ‘ޢީދު އުފާ’ ހަރަކާތްތައް ކުރިޔަށް ގެންދިޔުމަށް ހަމަޖެހިފައިވާ ސަރަހައްދުގެ އިތުރުން ބ. އޭދަފުށީ ‘ހިއްކި ބިން’ ސަރަހައްދުތަކުގައިވެސް ދިރާގުގެ މުވައްޒަފުން ހަރަކާތްތެރިވެފައި ވާކަމަށް އެ އަތޮޅުތަކުގެ ދިރާގުގެ ރީޖަނަލް އޮޕަރޭޝަން ސެންޓަރުތަކުން މައުލޫމާތު ދެއްވައެވެ.

މީގެ އިތުރުން އައްޑޫގެ އެކި ހިސާބުތަކުގެ 5 ޕްރީ ސްކޫލެއް ހިމެނޭ ސަރަހައްދުގައި ހަދިޔާ ބަހާފައިވާއިރު ހިތަދޫ އަދި ފުވައްމުލަކުގެ ގައިވެސް ދިރާގުގެ މުވައްޒަފުން ވަނީ އެރަށްރަށުގެ ކުޑަކުދިން އީދުގެ އުފަލުގައި ބައިވެރިވުމުގެ ގޮތުން ހަދިޔާދިނުން ކުރިޔަށް ގެންގޮސްފައެވެ.

ދިރާގުގެ ފަރާތުން މާލޭގައި ހަދިޔާ ބަހާފައިވަނީ އީދު ނަމާދަށްފަހު އިސްލާމީ މަރުކަޒުގަޔާއި، ފުރުޤާން މިސްކިތުގައެވެ. އޭގެ އިތުރުން އޭޑީކޭ ހޮސްޕިޓަލާއި އައިޖީއެމް ހޮސްޕިޓަލުގައި ތިބި ކުޑަކުދިންނަށާއި ހުޅުމާލެ ސެންޓްރަލް ޕާރކު ސަރަހައްދުގައިވެސް ވަނީ ހަދިޔާ ބަހާފައެވެ.

މީގެ އިތުރުންވެސް އެކި ރަށްރަށުގައި ހަދިޔާ ބަހާފައިވާއިރު މި ރަމަޟާން މަހު ދިރާގުން ކުރިޔަށް ގެންދިޔަ ‘އިފްތާރް އެޓް އެޗްއައިއެޗް’ ޕްރޮމޯޝަންގެ ތެރެއިން، ކ.ގުރައިދޫގައި ހުންނަ ހާއްސަ އެހީއަށް ބޭނުންވާ މީހުންގެ މަރުކަޒަށް ހަދިޔާ ކުރުމަށް ނިންމެވި އެސްއެމްއެސް ފައިސާވެސް މިއަދު ވަނީ އެ މަރުކަޒާއި ހަވާލުކޮށްފައެވެ.