ބޮންޑް އިންޓަނޭޝަނަލް ލޭންގުއޭޖު ލާރނިންގެ ސެންޓަރެއް ކެލާގައި ހުޅުވަނީ

ކުޅުދުއްފުށީގައި ހިންގައި ބޮންޑް އިންޓަނޭޝަނަލް ލޭންގުއޭޖު ލާރނިންގެ ސެންޓަރެއް  ހއ ކެލާގައި  ހުޅުވާ ގޮތަށް ހަމަޖެހިއްޖެ އެވެ.

ކެލާގައި މި ސެންޓަރު ހިންގުމަށް ވާންޖެހޭ ހުރިހާ ތައްޔާރީ ތަކެއްކޮށް މިހާރު ވަނީ ވެފަ އެވެ. އަދި ދަރިވަރުން ބައިވެރި ކުރުމުގެ ފުރުސަތު މިހާރު ވަނީހުޅުވާލާފަ އެވެ. މިސެންޓަރަކީ ކެލާ ޔޫތުފޯރަމް އާއި ބޮންޑް އިންޓަނޭޝަނަލް ގުޅިގެން އުފައްދާފައިވާ ސެންޓަރެކެވެ. އަދި މިސެންޓަރު ހިންގަން ހަމަޖެހިފައިވަނީ ކެލާ ޔޫތު ފޯރަމް އިދާރާގަ އެވެ.

ކެލާ ސެންޓަރުން މިހާރު ފުރުސަތު ހުޅުވާލާފައިވާ ކޯސްތަކަކީ އުމުރުން 7 އަހާރާއި 12 އަހަރު ދެމެދުގެ ކުދިންނަށް ހާއްސަކޮށްގެން ކެމްބުރިޖު ޔަންގުލާނަރ އާއި މޫވާރ އަދި ފުލެޔަރ މި ތިންކޯހެވެ. އަދި ދެބައި އުމުރުގެ ބޮޑެތި މީހުންނަށް އިނގިރޭސި ކިޔަވައިދޭ 8 މަސް ދުވަހުގެ ކޯހަކާއި ގުރޭދް 8 އަދި 9 ގެ ކުދިންނަށް އިނގިރޭސި އަދި ހިސާބު ކިޔަވައިދޭ 4 މަސް ދުވަހުގެ ހާއްސަ ކުލާހަކާއި 8 މަސްދުވަހުން އިނގިރޭސި އަދި ހިސާބުން އޯލެވެލް ހެދޭ ހާއްސަ ކޯސްތަކެއް ކަމަށް ބޮންޑް އިންޓަނޭޝަނަލް ލޭންގުއޭޖު ލާރނިން ސެންޓަރުން މައުލޫމާތު ދެއެވެ.

މި ކޯސް ތަކުގައި ކިޔަވައިދެއްވާނީ މާާސްޓާރސް ޑިގްރީ ހަދާފައިވާ ތިއްބެވި ތަޖުރިބާ ހުރި ރާއްޖޭން ބޭރު ޓީޗަރުން ނެވެ.

މި ކޯސްތަކުގައި ބައިވެރިވުމަށް ފޯމު ދޫކުރުމާއި ބަލައިގަތުން އޮންނާނީ ހއ ކެލާ ޔޫތު ފޯރަމް އިދާރާ ގައެވެ. އަދި މިސެންޓަރުން ކިޔަވާ ހުރިހާ ކުލާސްތަކަށް ބޭނުންވާ ހުރިހާ ފޮތްތަކާއި ފަންސޫރާއި ސްޓޭޝަނަރީ ގެ ގޮތުގައި ބޭނުންކުރާ ހުރިހާ ތަކެއްޗެއް ސެންޓަރުން ލިބެން ހުންނާނެ ކަމަށް ބޮންޑް އިންޓަނޭޝަނަލް ލޭންގުއޭޖު ލާރނިން ސެންޓަރުން މައުލޫމާތު ދެއެވެ.

ކެމްބުރިޖު އިންގުލިސް ޔަންގު ލާނާރ ޕުރޮގުރާމުގައި ބައިވެރިވެ ކިޔަވާ ކުދިންނަށް ދޭ ސެޓްފިކެޓަކީ އިނގިރޭސިވިލާތުގެ ކެމްބުރިޖު ޔުނިވާސިޓީ ގެ ސެޓްފިކެޓެކެވެ. އަދި ބޮޑެތި މީހުންނަށް ކިޔަވައިދޭ ކުލާހުގައި ދެވޭ ސެޓްފިކެޓަކީ ބޮންޑް އިންޓަނޭޝަނަލް ލޭންގުއޭޖު ލާރނިން ސެންޓަރުން ދޭ ސެޓްފިކެޓެއް ކަމަށް އެ ސެންޓަރުން މައުލޫމާތު ދެއެވެ.

ބޮންޑް އިންޓަނޭޝަނަލް ލޭންގުއޭޖު ލާރނިން ސެންޓަރަކީ ކުޅުދުއްފުށީގައި ރަޖިސްޓްރީކޮށް ތިލަދުންމަތީގައި ތައުލީމު ހާސިލް ކުރާ އުމުރުފުރާގެ ކުދިންނަށް އިންޓަނޭޝަނަލް ތައުލީމު ފުޅާ ދާއިރާއެއްގައި ދިނުމަށް މަސައްކަތް ކުރަމުން އަންނަ އިންޓަނޭޝާނަލް ލޭންގުއޭޖު ލާރނިން ސެންޓަރެކެވެ.