އިހަވަންދޫގައި ޑެންގީހުން ބާރަށް ފެތުރެނީ، ރައްޔިތުން ތިބީ ހާސްކަންމަތީ

 

ހއ އިހަވަންދޫގައި ޑެންގީހުން ކޮންޓްރޯލު ނުކުރެވި ބާރަށް ފެތުރި، ޑެންގީ ޖެހުނު މީހުންގެ އަދަދު 60 އަށް އަރައިފި އެވެ.

ހެލްތު ޕްރޮޓެކްޝަން އެޖެންސީން ބުނީ ޑެންގީ ހުން ޖެހިގެން އެންމެ ގިނަ ރިޕޯޓު ލިބިފައި ވަނީ އިހަވަންދޫން ކަމަށެވެ. މިއަހަރުގެ އޭޕުރީލް މަހުން ފެށިގެން މިއަދުގެ ނިޔަލަށް ޖުމުލަ 60 މީހުން ޑެންގީ ހުމަށް ޕޮޒިޓިވް ވެފައި ވާއިރު،  ޖޫން މަހުގެ 16 ން ޖުލައި މަހުގެ 9 ވަނަ ދުވަހުގެ ނިޔަލަށް އިހަވަންދޫން ވަނީ 25 މީހަކު ޑެންގީ  ޕޮޒިޓިވް ވެފައެވެ

އިހަވަންދޫ ސިއްހީ މަރުކަޒު ހިންގުމާ ހަވާލުވެ ހުންނެވި ޝަހުމާ މޫސާ ވިދާޅުވި “މިހާރަށް” ދީފައިފައިވާ އިންޓަވިއުގެ ވިދާޅުވެފައިވަނީ މިދިޔަ އޭޕްރީލް މަހުން ފެށިގެން އިއްޔެގެ ނިޔަލަށް ޑެންގީ ޖެހިގެން 56 މީހަކު ޑޮކްޓަރަށް ދައްކާފައިވާ ކަމަށެވެ.

އަދި  މި ހުން ޖެހިފައިވާ ތިން މީހަކު މިހާރު ވެސް އެ ތަނުގައި އެޑްމިޓްކޮށް ފަރުވާ ދެމުންދާ ކަމަށެވެ. ބޮޑު އާބާދީއެއް އޮންނަ އިހަވަންދޫގައި މި ހުން ޖެހިގެން ރިޕޯޓު ކުރާ މިންވަރު ދުވަހުން ދުވަހަށް އިތުރުވަމުން އަންނަ ކަމަށެވެ. އޭނާ ވިދާޅުވެފައިވަނީ އެއް ދުވަހުގެ ތެރޭގައި ހަތަރު މީހަކު ޑެންގީ އަށް ޕޮޒިޓިވް ވެފައި ވާއިރު، ހުން ޖެހެނީ ގިނައިން ކުޑަކުދިންނަށް ކަމަށެވެ.

ޝަހުމާ ވިދާޅުވި ގޮތުގައި ރަށުގެ ހާލަތު އޮތް ގޮތުން ރައްޔިތުން ތިބީ ވަރަށް ކަންބޮޑުވެފަކަމަށާއި ކޮންމެ ދުވަހަކު ހެން ޑެންގީގެ ކޭހެއް ފެންނަކަމަށެވެ.

ކޭއޯއާ ވާހަކަ ދައްކަވަމުން އިހަވަންދޫ ކައުންސިލަރަކު ވިދާޅުވީ ރަށުން ޑެންގީ ހުން ފެންނަތާ މަސްތަކެއް ވެފައިވާއިރު އެކަން ކޮންޓްރޯލުކުރުމަށް  ސަރުކާރުން މާބޮޑު ސަމާލުކަމެއް ނުދޭ ކަމަށެވެ. އަދި ޖަމްއިއްޔާތަކުން އިސްނަގައިގެން މަދިރި އުފެދޭތަންތަން ނައްތާލުމަށް ރަށު ފެންވަރުގައި މަސައްކަތް ކުރި ނަމަވެސް އެކަމުން އެދެވޭ ނަތީޖާއެއް ނުފެންނަކަމަށް އޭނާ ވިދާޅުވީ އެވެ.