މުހައްމަދު އަލީގެ އާއިލާއަށް ތައުޒިޔާ ދެންނެވުމަށް ރައީސްގެ ހާއްސަ މަންދޫބެއް ފޮނުއްވައިފި

މިދިޔަ އާދިއްތަ ދުވަހު ކުއްލިގޮތަށް ނިޔާވި ކުޅުދުއްފުށީ، އާވެލި މުހައްމަދު އަލީގެ އާއިލާއަށް ތައުޒިޔާ ދެންނެވުމަށް ރައީސުލް ޖުމްހޫރިއްޔާގެ ހާއްސަ މަންދޫބެއް ކުޅުދުއްފުއްޓަށް ފޮނުއްވައިފި އެވެ.

ރައީސްގެ ހާއްސަ މަންދޫބެއްގެ ގޮތުގައި ކުޅުދުއްފުއްޓަށް ވަޑައިގެންނެވީ ނިލަންދޫ ދާއިރާގެ މަޖިލިސް މެމްބަރު ޑރ. އަބުދުﷲ ހަލީލެވެ. އޭނާ ވަނީ އިއްޔެ މަރުހޫމް މުހައްމަދުގެ އާއިލާގެ ބޭފުޅުންނާ ބައްދަލުކުރައްވައި ރައީސްގެ ތައުޒިޔާ ވިދާޅުވެ، ހިތްވަރު ދެއްވާފަ އެވެ.

ހަލީލުގެ މި ދަތުރުފުޅުގައި ޕީޕީއެމްގެ އިސް ބައެއް ފަރާތްތަކުންވެސް ބައިވެރިވެލެއްވި އެވެ. މުހައްމަދު އަލީއަކީ ޕީޕީއެމްގެ ކުޅުދުއްފުށީ ބައެއް ގޮފިތަކުގެ ރައީސްކަން ކުރެއްވި ބޭފުޅެކެވެ.