ސައިކަލަކާއި ބައިސްކަލެއް އެކްސިޑެންޓްވެ، ސައިކަލްގަ އިން މީހާ “ފިލައިފި”

ކުޅުދުއްފުށީގައި މިރޭ ސައިކަލަކާއި ބައިސްކަލެއް އެކްސިޑެންޓްވެ، ސައިކަލް ދުއްވަން އިން މީހާ “ފިލައިފި” އެވެ.

މިއެކްސިޑެންޓް ހިންގާފައިވަނީ މިރޭ 8:45 ހާއިރު ފުރުންމާގެ އާއ ދިމާ އަމީނީމަގުގަ އެވެ. މިއެކްސިޑެންޓްގައި ސައިކަލް ދުއްވަން އިން މީހާއަށް އަނިޔާވެފައިވާ ނުވާއިރު ބައިސްކަލްގައި އިން ކުއްޖާއަށް ވަނީ އެކި ވަރުގެ އަނިޔާތައް ވެފަ އެވެ.

އެމަންޒަރު ފެނުނު މީހުން ކޭއޯއަށް މައުލޫމާތު ދެމުން ބުނީ އެކްސިޑެންޓްވުމުން ސައިކަލް ދުއްވަން އިން މީހާ ދުވެފައި ގޮސް އެތާހުރި ގެއެއްގެ ތެރެއަށް ވަދެ އިނީ “ފިލައި” ކަމަށެވެ. އެކުއްޖާ މަގުމަތިން ނަގައި ފުލުހުންނަށާއި ހޮސްޕިޓަލަށް ގުޅާފައިވަނީ އެސަރަހައްދަށް އެއްވި މީހުން ނެވެ.

އެކުއްޖާ ހޮސްޕިޓަލަށް ގެންދިޔައިރުވެސް އެމީހާ އެ ގެއިން ނުކުމެފައި ނުވާ ކަމަށް އެމަންޒަރު ދުއް މީހުން ބުނެފައިވެ އެވެ.

ފުލުހުންގެ މީޑިއާ އޮފިޝަލް ކޭއޯއަށް ވިދާޅުވީ މިރޭ 8:46 ގައި ބައިސްކަލަކާއި ސައިކަލެއް ޖެހި ކުޅުދުއްފުށީގައި ހިންގި އެކްސިޑެންޓްގައި އަނިޔާވި 15 އަހަރުގެ ފިރިހެން ކުއްޖާއަށް ފަރުވާ ދެމުން އަންނަކަމަށެވެ. އަދި ސައިކަލް ދުއްވަން އިން މީހާ “ފިލި” ކަމުގެ ރިޕޯޓެއް ލިބިފައި ނުވާ ކަމަށެވެ.