ޖުލައި 26 ގައި ސްކޫލުތަކުން ބާއްވާ ޕެރޭޑްގައި 416 ދަރިވަރުން ބައިވެރިވޭ

ޖުލައި 26 ގައި ކުޅުދުއްފުށީ ސްކޫލުތަކުން ބާއްވާ ޕެރޭޑްގައި 416 ދަރިވަރުން ބައިވެރިވާނެ ކަމަށް އެކަން އިންތިޒާމްކުރާ ފަރާތުން ބުނެފި އެވެ.

ޖަލާލުއްދީން ސްކޫލުގެ ކެޑޭޓުން އިސްނައިގެން ކުރިއަށްގެންދަން ހަމަޖެހިފައި އޮތް މި ޕެރޭޑުގައި ޖަލާލުއްދީން ސްކޫލުގެ އިތުރުން ހދ އަތޮޅު ތައުލީމީ މަރުކަޒާއި އަފީފުއްދީން ސްކޫލުން ބައިވެރިވެ އެވެ.

ޖަލާލުއްދީން ސްކޫލުގެ އިންފޮމޭޝަން އޮފިޝަލް އައިޝަތު ހަސަން ވިދާޅުވީ މި ޕެރޭޑްގައި ކެޑޭޓުން އިތުރުން ސްކޫލުތަކުގެ ޔުނީފޯމް ހަރަކާތްތަކުން ބައިވެރިވާނެ ކަމަށެވެ. އެގޮތުން ގުރޭޑް 4 ން ފެށިގެން މަތީ ގުރޭޑްތަކުގެ ޔުނީފޯމް ހަރަކާތްތައް ފެނިގެންދާނެކަމަށް އޭނާ ވިދާޅުވި އެވެ.

ގިނަ އަހަރުތަކެއްގެ މެދުކެނޑުމަކަށް ފަހު ކުޅުދުއްފުށިގައި ބާއްވަން ތައްޔާރުވަމުންދާ މި ޕެރޭޑްގައި ސްކުލޫތަކުގައި 416 ދަރިވަރުން ބައިވެރިވާނެ ކަމަށް އައިޝަތު ވިދާޅުވި އެވެ.

މިއަހަރު މި ޕެރޭޑް ބާއްވާއިރު އެންމެ ފުރިހަމަ ނުވާނެ ކަމަށާއި ބައެއް ކަންކަން މުޅިން ފުރިހަމަ ނުވާނެކަން އޭނާ ފާހަގަކުރި އެވެ. އެހެންނަމަވެސް ކުރިއަށް އޮތްތަނުގައި ބާއްވާ ޕެރޭޑްތައް ފުރިހަމަކުރަން މަސައްކަތްކުރާނެ ކަމަށް އައިޝަތު ވިދާޅުވި އެވެ.

އައިޝަތު ވިދާޅުވީ ޕެރޭޑްތަކުގައި ބައިވެރިވާ ސްކޫލުތައް ފިޔަވާ ކައުންސިލާއި ކުޅުދުއްފުށީ ޕޮލިހުގެ އެއްބާރުލުން ވަރަށް ބޮޑަށް ލިބުނުކަން އޭނާ ފާހަގަކުރެއްވި އެވެ.

މި ޕެރޭޑް ކުރިއަށްދާނީ ޖުލައި 26 ވަނަ ދުވަހުގެ ހަވީރު ކުޅުދުއްފުށީ އަމީނީމަގުގަ އެވެ. ޖަލާލުއްދީން ފަށާ މި ޕެރޭޑް 5 ތަނަކަށް މަޑުކުރަން ހަމަޖެހިފަވެ އެވެ. މަޑުކުރާ ޕޮއިންޓްތަކަކީ ހުކުރު މިސްކިތް ކައިރި، ހދ އަތޮޅު ކައުންސިލް އިދާރާ ކުރިމަތި، އަފީފުއްދީން ސްކޫލް ކައިރި، ކުޅުދުއްފުށި އޮންލައިން އޮފީސް ކައިރި، ހދ އަތޮޅު ތައުލީމީ މަރުކަޒު ކުރިމަތި އެވެ.