ގައުމު ތަރައްގީކުރުމުގެ ފުރިހަމަ މިނިވަންކަން ކައުންސިލުތަކަށް ދޫކޮށްލަންޖެހޭ: ހދ އަތޮޅު ކައުންސިލްގެ ރައީސް

ޒަމާނާ އެއްގޮތަށް ގައުމު ތަރައްގީކުރަން ބޭނުންނަމަ ގާނޫނޫ އަސާސީ ކައުންސިލުތަކަށްދީފައިވާ ބާރު ސަރުކާރުން ދޫކޮށްލައި ގައުމު ތަރައްގީކުރުމުގެ ފުރިހަމަ މިނިވަންކަން ކައުންސިލުތަކަށް ދޫކޮށްލަން ޖެހޭކަމަށް ހދ އަތޮޅު ކައުންސިލުގެ ރައީސް އަލްއުސްތާޒް އަހުމަދު އިބުރާހިމް ވިދާޅުވެއްޖެ އެވެ.

ރޭ ހދ އަތޮޅު ކައުންސިލް އިދާރާގައި ބޭއްވި ދިދަ ނެގުމުގެ ރަސްމިއްޔާތުގައި ވާހަކަ ދައްކަވަމުން އަތޮޅު ކައުންސިލުގެ ރައީސް އަހުމަދު އިބުރާހިމް ވިދާޅުވީ ދާޚިލީ މިނިވަންކަމާއި ތަރައްގީގެ ކަންކަން ނިންމާ ތަންފީޒު ކުރުމުގައި ގާނޫނު އަސާސީ ކައުންސިލުތަކަށް ލިބިފައިވާ ބާރުތައް ސަރުކާރުން ހިފަހައްޓާފައި އޮތުން ނިމުމަކަށް ގެނެސް ގައުމުގެ ތަރައްގީކުރުމުގެ ފުރިހަމަ މިނިވަންކަން ކައުންސިލުތަކަށް ދޫކޮށްލުމަށް ސަރުކާރަށް ގޮވާލި އެވެ.

މިނިވަން ދުވަހުގެ އިހްސާސް ކުރެވޭއިރު ގައުމު ތަރައްގީކުރުމަށާއި ތަންފީޒުކުރުމަށް ހުރި މިނިވަންކަމުގެ ހަނިކަމާއި އެ ދަތިތަކުގެ ވާހަކަ ދައްކަން ޖެހޭ ކަމަށް ރައީސް ވިދާޅުވި އެވެ.

” ކައުންސިލުތަކަކީ ހަމައެކަނި ސަރުކާރުން އިންތިޒާމްކުރާ ކަންކަމުގަ، ދަތުރެއް ހަމަޖައްސާލައި ނޫނީ ހުރުމާއި ކެއުމުގެ ކަންކަން ހަމަޖައްސާލައި މުވައްސަސާތަކަކަށް ހެދުމުގެ ބަދަލަކުގައި ،ކައުންސިލުތައް ހިންގުމަށްޓަކާ ގާނޫނޫ އަސާސީގައި ލިބިދީފައިވާ ފުރިހަމަ ބާރުވެރިކަން ކައުންސިލުތަކަށް ދޫކޮށްލަން ޖެހޭ ” ހދ އަތޮޅު ކައުންސިލްގެ ރައީސް ވިދާޅުވި އެވެ.

އަހުމަދު ވިދާލުވީ މާލޭގައި ގާއިމް ކޮށްފައިހުރި މުވައްސާސާތަކާއި ބައްދަލުކުރުމުގެ މިނިވަން ކަން ވެސް ކައުންސިލަށް ލިބިފައިވާ ނެތްކަމަށާއި އެ މިނިވަންކަން ވެސް އޮންނަ ޖެހޭނެ ކަމަށެވެ.

އެ މިނިވަންކަން މިއަދު ލިބިފައި ނެތްކަމީ ހިތާމަކުރައްވާ ކަމެއް ކަމަށާއި މިކަންކަމަކީ ކޮންމެބޭފުޅަކުވެސް ފަރުދީގޮތުން ވިސްނަލަންޖެހޭ ކަންކަން ކަންކަން ކަމަށެވެ. އަދި މިނިވަންކަން، މިނިވަންކަމުގެ ހުދޫދުގެ ތެރޭގައި ކައުންސިލުތަކަށް ލިބެންޖެހޭ ހައްގުތަކުގެ ވާހަކަ ދެއްކުމަކީ، ކައުންސިލުތަކުން ކުރަންޖެހޭނެ ކަމެއް ކަމުގައި ގަބޫލުކުރައްވާ ކަމަށް އަޙުމަދު އިބްރާހީމް ވިދާޅުވިއެވެ