ކުޅުދުއްފުށީ ކައުންސިލަށް އެމްޑީޕީގެ ޓިކެޓްގައި ކުރިމަތިލުމަށް ހުޅުވާލައިފި

ލޯކަލް ކައުންސިލް އިންތިހާބުގައި އެމްޑީޕީ ޓިކެޓްގައި ކުޅުދުއްފުށީ ކައުންސިލަށާއި ހދ އަތޮޅު ކައުންސިލުގެ ކުޅުދުއްފުށީގެ ދާއިރާތަކަށް ވާދަކުރަން ބޭނުންވާ ކެޑިޑޭޓުން ހޮވުމަށް ބާއްވާ ޕްރައިމެރީ ކުރިމަތިލުމުގެ ފުރުސަތު ހުޅުވާލައިފި އެވެ.

ކުޅުދުއްފުށީ އެމްޑީޕީ އޮފީހުން ނެރުނު އިއުލާނެއްގައި ބުނެފައިވަނީ އިންތިހާބުގައި އެ ޕާޓީން ވާދަކުރަން ޝައުގުވެރިވާ ފަރާތްތަކުން މި މަހުގެ 20 ގެ ކުރިން އެ އޮފީހަށް ފޯމު ހުށަހަޅަން ޖެހޭނެ ކަމަށެވެ.

ޕްރައިމެރީގައި ވޯޓް ލެވޭނީ 20 އޮކްޓޯބަރު ވާ ބުރާސްފަތި ދުވަހުގެ 12:00 ގެ ނިޔަލަށް އެމްޑީޕީގެ މެމްބަރޝިޕް ކޮމެޓީން މެމްބަރެއްގެ ގޮތުގައި ބަލައިގެންފައިވާ އެޕާޓީގެ މެމްބަރުންނަށް ކަމަށް އެމްޑީޕީ ބުނެ އެވެ.

ކައުންސިލް އިންތިހާބުގެ އެމްޑީޕީ ޕްރައިމަރީގެ ވޯޓުލުން ކުރިއަށްދާނީ ނޮވެމްބަރު 17 ،18 އަދި 19 ގައި އެވެ.

ކައުންސިލް އިންތިހާބުގައި ވާދަކުރުމުގެ ފުރުސަތު ހުޅުވާލީ މިމަހުގެ 26 ގަ އެވެ. މި އިންތިހާބު ބާއްވާ ގޮތަށް ހަމަޖައްސާފައި ވަނީ އަންނަ އަހަރުގެ ޖެނުއަރީ 14 ގަ އެވެ.

ރަށު ކައުންސިލާއި އަތޮޅު ކައުންސިލްތަކުގެ މެމްބަރުންގެ އަދަދު މަދުކުރަން ލޯކަލް ކައުންސިލްތަކުގެ ގާނޫނަށް ގެނައި އިސްލާހުގެ ސަބަބުން ކުޅުދުއްފުށީ ކައުންސިލަށް މިފަހަރު އިންތިހާބު ކުރާނީ 5 މެންބަރުންނެވެ. މިއަތޮޅު ކައުންސިލަކަށް އިންތިހާބުކުރާނީ ކޮންމެ އިންތިހާބީ ދާއިރާއަކުން އެއް ކައުންސިލަރެކެވެ.