ށ. ފީވަކުން ފުރައިގެން ޑިންގީއެއްގައި ފޯކައިދު އަށް ދަނިކޮށް އިންޖީނު ގޮވައި، ހިނގި އެކްސިޑެންޓްގައި ޒަހަމްވި ޒުވާނާ އިތުރު ފަރުވާއަށް މާލެ ފޮނުވުގެ މަސައްކަތް ކުރަމުން އަންނަ ކަމަށް ހދ. ކުޅުދުއްފުށީ ރީޖަނަލް ހޮސްޕިޓަލުން ބުނެފި އެވެ.
ކޭއޯ އަށް މައުލޫމާތު ދެމުން ހޮސްޕިޓަލުން ވިދާޅުވީ ޕޭޝަންޓް މާލެ ފޮނުވާލަން ހަމަޖެހިފައިވަނީ މިއަދު 12 ޖަހާއިރު ސީ ޕްލޭން އެއްގައި ކަމަށެވެ. އޭނާއަށް ލިބިފައި ހުރި ޒަހަމްތައް ސީރިއަސް ކަމަށްވެސް ހޮސްޕިޓަލުން މައުލޫމާތު ދެއެވެ.
މި ހާދިސާ ގައި އަނިޔާވީ ފީވަކު، އޯކިޑްމާގެ އަބުދުﷲ ފަޒީލް(32އ) އެވެ. ހާދިސާ ހިނގީ އޭނާ އާއި އެހެން ޒުވާނަކު ޑިންގީގައި ދަނިކޮށް އޭގެ އިންޖީނު ހަލާކުވެ، އިންޖީނުގެ ތެރޭގައި ވަށްބުރެއްހެން ތޫނުކޮށްއިން ފުލައިވީލް ނައްޓައިގެން ގޮސް ފަޒީލްގެ ބަނޑުގަ ޖެހިގެން ކަމަށާއި ޑިންގީން ދަތުރު ކުރި އަނެއް ޒުވާނާއަށް އެއްވެސް އަނިޔާއެއް ނުވާކަމަށް މައުލޫމާތު ލިބެއެވެ.