މާދަމާ ރޭ ފާހަގަކުރާ އަރތް އަވަރ ގައި ދިވެހި ހުރިހާ ރައްޔިތުން ބައިވެރިވެވަޑައިގަތުމަށް ރައީސް ނަޝީދު އެދިވަޑައިގެންފި

މާދަމާ ރޭ ފާހަގަކުރާ އަރތް އަވަރ ގައި ދިވެހި ހުރިހާ ރައްޔިތުން ބައިވެރިވެވަޑައިގަތުމަށް ރައީސް ނަޝީދު އެދިވަޑައިގެންފިއެވެ.

ރައީސުލްޖުމުހޫރިއްޔާ މުހައްމަދު ނަޝީދު މިއަދު ދެއްވި ހަފްތާ ރޭޑިއޯ ޚިތާބުގައި ވާހަކަދައްކަވަމުން އެމަނިކުފާނު ވިދާޅުވީ، މާދަމަރޭ 8.30 ން 9.30 އަށް ފާހަގަކުރާ އާތު އަވާ ޕްރޮގްރާމްގައި ބައިވެރިވުމަށްޓަކައި ކޮންމެހެން ބޭނުންކުރަންޖެހޭ ބޮކި، ހޮޅިބުރިފަދަ ތަކެތި ފިޔަވައި އެހެން ހުރިހާ ބޮތްކަކާއި ހޮޅިބުރިތައް އެ އެއްގަޑިއިރަށް ނިއްވާލުމަށް ހަމަޖެހިފައިވާ ކަމަށާއި އެކަމުގައި ހުރިހާ ރައްޔިތުން ބައިވެރިވުމަށް އެދިވަޑައިގަންނަވާ ކަމަށެވެ.

އާރތު އަވާރ ފާހަގަކުރުމުގެ މުހިއްމު ކަމުގެ މައްޗަށް ވާހަކަދައްކަވަމުން ރައީސް ވިދާޅުވީ އާރތް އަވާރ އަކީ، ދުނިޔޭގެ ހޫނުވުމާއި ތިމާވެށްޓަށް އަންނަމުންދާ ބަދަލުތަކާމެދު މީހުންގެ މެދުގައި ހޭލުންތެރިކަން އިތުރުކުރުމުގެ ގޮތުން ވަރލްޑް ވައިލްޑް ލައިފް އިން 2007 ވަނަ އަހަރުން ފެށިގެން މުޅި ދުނިޔޭގައި ހިންގަމުންގެންދާ ކެމްޕެއިނެއް ކަމަށާއި އާރތް އަވާރ ގެ މަގުސަދަކީ، މޫސުމަށް އަންނަމުންދާ ބަދަލުތަކާމެދު އިންސާނުންގެ ހޭލުންތެރިކަން އިތުރުކުރުމާއެކު، ތިމާވެށްޓާ ރައްޓެހި ދިރިއުޅުމުގެ ވައްޓަފާޅިއަށް ދިޔުމަށް ހިތްވަރު ދިނުން ކަމަށެވެ.