އެމްޑަބްލިޔުއެސްސީން ކުޅުދުއްފުށީގައި ފެނުގެ ހިދުމަތް ދޭންފަށައިފި

އިބްރާހިމް ހަމީދު

މޯލްޑިވްސް ވޯޓަރ އެންޑް ސްވަރޭޖް ކޮމްޕެނީ އިން ކުޅުދުއްފުށީ ގޭގެއަށް ފެނުގެ ހިދުމަތްދޭން ފަށައިފިއެވެ.

ކުޅުދުއްފުށީ އޮންލައިނަށް މަޢުލޫމާތު ދެއްވަމުން އެމްޑަބްލިޔުއެސްސީގެ ބިޒްނަސް ޑިވޮލޮޕްމަންޓްގެ މެނޭޖަރ ހަސަން ސައީދު ވިދާޅުވީ ކުޅުދުއްފުށީގެ 12 ގެއަކަށް ފެނުގެ ހިދުމަތް މިހާރު ލިބެމުންދާނެ ކަމަށާއި ޖުމްލަ 56 ގޭގައި ކަނެކްޝަން ހަރުކުރެވިފައިވާނެ ކަމަށެވެ.

ފެނުގެ ކަނެކްޝަން ހަރުކުރެވިފައިވާ 56 ގެއަށްވެސް ފެން ދޫކުރުމުގެ ކުރިން ކުރަންޖެހޭ ސާރވޭތައް ކުރަމުންދާ ކަމަށާއި ހިދުމަތަށް އެދިފައިވާ ފަރާތް ތަކަށް ހިދުމަތް ދިނުމުގެ މަސައްކަތް ވަރަށް ބާރަށް ކުރިއަށްދާ ކަމަށް އެކުންފުނިން މައުލޫމާތު ދެއެވެ.

ފެނުގެ ހިދުމަތަށް އެދުމުގެ ފުރުސަތު ދެފަހަރެއްގެ މަތިން ހުޅުވާލުމުން މިއަދުގެ ނިޔަލަށް 1010 ފަރާތަކުން އެޕްލިކޭޝަން ފޯމް ހުށަހަޅާފައިވާކަމަށް ގައުމީ ފެންކުނިން މައުލޫމާތުދެއެވެ.

ކުޅުދުއްފުށީގައި ފެނުގެ ހިދުމަތް ދިނުމުގެ މަޝްރޫއު ރަސްމީކޮށް އިފްތިތާހު ކޮށްދެއްވާފައިވަނީ މިދިޔަ އަހަރުގެ ޖުލައި މަހުގެ 29 ވަނަ ދުވަހު ރައީސުލްޖުމުހޫރިއްޔާ ކުޅުދުއްފުއްޓަށް ކުރެއްވި ރަސްމީ ދަތުރުފުޅެއްގައެވެ.