ނަމާދުކުރާ ބައެއް ހިމެނޭގޮތަށް ނޮޅިވަރަންފަރު ބަނދަރުގައި ދަތުރުހިޔާއެއް އެޅުމަށް ބަޔަކާ ހަވާލުކޮށްފި

ހދ ނޮޅިވަރަންފަރު ބަނދަރު ސަރަހައްދުގައި ދަތުރުހިޔާއެއް އެޅުމަށް އެރަށު ކޮޅުދާލި ކާޕެންޓްރީ އެންޑް މެޓަލްސް ވޯލްސްއާ ހަވާލުކޮށްފި އެވެ. ދަތުރު ހިޔާ ހަދަނީ ނަމާދުކުރާ ބައެއް ހިމަނައިގެންނެވެ.

ނޮޅިވަރަންފަރު ކައުންސިލުގެ އިދާރާގައި ބޭއްވި ބައްދަލުވުމުގައި އެ އެއްބަސްވުމުގައި ކައުންސިލުގެ ފަރާތުން ސޮއިކުރެއްވީ ނޮޅިވަރަންފަރު ކައުންސިލުގެ ރައީސް އަލްއުސްތާޒު އަހުމަދު އިބްރާހީމް އެވެ. ކޮޅުދާލި ކާޕެންޓްރީ އެންޑް މެޓަލްސް ވޯކްސްގެ ފަރާތުން ސޮއިކުރައްވާފައިވަނީ އެކޮމްޕްނީގެ މެނޭޖަރ އަހުމަދު ހަސަން އެވެ.

ނޮޅިވަރަންފަރު ކައުންސިލުން 370،000ރ ރުފިޔާ ހަރަދުކޮށް އަޅައި ދަތުރުހިޔާއެކެވެ. ހަވާލުކުރާތާ 90 ދުވަސްތެރޭގައި މަސައްކަތް ނިންމަން ޖެހެ އެވެ.

ނޮޅިވަރަންފަރުގައި ބަނދަރު ހަދައި ނިމިފައިވާއިރު ބަނދަރު ބޭނުންކުރަން ރައްޔިތުން ވަނީ ފަށާފައި އެވެ. ކައުންސިލުން ބުނީ ބަނދަރު ސަރަހައްދުގައި ހިޔާވާނެ ތަނެއް ނެތުމުގެ ސަބަބުން ރައްޔިތުންގެ ފަސޭހައަށްޓަކާ ހަދާ ތަނެއްކަމަށެވެ.

ނަމާދުކުރެވޭނެ އިންތިޒާމު ރާއްޖޭގެ ރަށްރަށުގައި ހުންނަ ދަތުރުހިޔާ ފަދަ ތަންތަނުގައި ވަރަށް މަދުން ނޫނީ އިންތިޒާމުކުރެވިފައިނުހުރެ އެވެ. މިތަން ނިމޭއިރު ދެ ފާހާނާވެސް ހުންނާނެކަމަށް ކައުންސިލުން ބުނެ އެވެ.

ބަނދަރުގެ މަސައްކަތް ނިމިފައިވީނަމަވެސް ބަނދަރު ރަސްމީކޮށް ހުޅުވާފައެއް ނުވެ އެވެ.