ބްރޯޑްކާސްޓިންގ ކޮމިޝަނުގެ ރައީސަކަށް ބަދުރު، ނައިބު ރައީސަކަށް ޝަހީބު

މޯލްޑިވްސް ބްރޯޑްކާސްޓިންގ ކޮމިޝަންގެ ރައީސަކަށް ދިވެހިރާއްޖޭގެ އަޑުގެ ކުރީގެ ޑިރެކްޓަރ ޖެނެރަލް ބަދުރުއް ނަސީރާއި ނާއިބު ރައީސަކަށް ސަން އެފްމްއެމްގެ ކުރީގެ ސީއޯއޯ މުހައްމަދު ޝަހީބު ހޮވައިފި އެވެ.

ރައްޔިތުންގެ މަޖިލީހުގެ ރުހުމާއެކު ރައީސް މުހައްމަދު ނަޝީދު އިއްޔެ މެމްބަރުން އައްޔަން ކުރެއްވި ކޮމިޝަންގެ އެންމެ އިސް ދެ މަގާމަށް އެ ދެ ބޭފުޅުން އިންތިހާބުކުރީ މިއަދު ހެނދުނު އެކޮމިޝަންގެ ހަތް މެންބަރުންގެ މެދުގައި ނެގި ސިއްރު ވޯޓަކުންނެވެ.

ބްރޯޑްކާސްޓް ކޮމިޝަނުގެ ރައީސަކަށް ބަދުރު ނަސީރު ހޮވިވަޑައިގަތީ ހަތް މެމްބަރުންގެ އިއްތިފާގުންނެވެ. ނައިބު ރައީސްކަމުގެ މަގާމަށް ހޮވުނު ޝަހީބަށް ލިބިވަޑައިގަތީ ހަ ވޯޓެވެ. އެ ދެމަގާމަށް ބަދުރު އާއި ޝަހީބުގެ އިތުރުން އެއްވެސް ބޭފުޅަކު ކުރިމަތިލައްވާފައެއް ނުވެއެވެ.

މޯލްޑިވްސް ބްރޯޑްކާސްޓިންގ ކޮމިޝަނަކީ ދިވެހިރާއްޖޭގައި ބްރޯޑްކާސްޓްކުރުމުގެ ސިޔާސަތުތައް ތަންފީޒުކޮށް، އެސިޔާސަތުތައް ދިފާޢުކޮށް ރައްކާތެރިކުރުމާއި، ބްރޯޑްކާސްޓްކުރާ ފަރާތްތަކުން އެސިޔާސަތުތަކަށް ޢަމަލުކުރޭތޯ ބަލައި އެސިޔާސަތުތަކާއި ޚިލާފުވާ ފަރާތްތަކާމެދު ފިޔަވަޅު އަޅައި، ބްރޯޑްކާސްޓްކުރުމުގެ ސިޔާސަތާގުޅޭ އެންމެހާ ކަންކަން ކުރުމަށް ބްރޯޑްކާސްޓްކުރުމުގެ ޤާނޫނުން އުފައްދާފައިވާ ކޮމިޝަނެކެވެ.