ކުރީގެ އަތޮޅު އޮފީހުގެ ނަމުގައި ހުރި މޮޑެމްތަކެއް އެމްޑީޕީ އެކްޓިވިސްޓުން ބޭނުން ކުރަމުންދާކަމުގެ ހަބަރު ލިބިއްޖެ

މިހާރުގެ އަތޮޅު ކައުންސިލް އިދާރާގެ (ކުރީގެ އަތޮޅު އޮފީސް) ނަމުގައި ވަތަނިއްޔާ އިން ނަގާފައިހުރި މޮޑެމްތަކެއް، އެމްޑީޕީގެ އެކްޓިވިސްޓުންތަކެއް ބޭނުން ކުރަމުންދާ ކަމުގެ ހަބަރު ލިބިއްޖެއެވެ.

އިތުބާރު ހުރި ފަރާތަކުން ކުޅުދުއްފުށީ އޮންލައިނަށް ހަބަރު ދީފައިވާ ގޮތުގައި އެމްޑީޕީގެ އެކްޓިވިސްޓުންތަކެއް ދަނީ އަތޮޅު އޮފީހުގެ ނަމުގައި ހުރި މޮޑެމްތަކެއް ބޭނުންކުރަމުންނެވެ. އަދި ކޮންމެ މަހެއްގެ ބިލްވެސް އަތޮޅު އޮފީހުގެ ފަރާތުން ދައްކަމުން ދާކަމަށް މައުލޫމާތު ލިބިފައިވެއެވެ. ނަމަވެސް އަތޮޅު ކައުންސިލުން އެއިދާރާ ހިންގުމާއި ހަވާލުވުމާއި ގުޅިގެން މިގޮތަށް އޮފީހުން ބޭރުގެ ފަރާތްތަކުގެ އަތުގައި ހުރި އެއިދާރާގެ ތަކެތި ހޯދުމުގެ މަސައްކަތް ދަނީ ކުރަމުންނެވެ. އަދި އެތަކެތި އަނބުރާ އެއިދާރާއަށް ރައްދުކޮށްދިނުމަށް އެތަކެތި ގެންގުޅޭ ފަރާތްތަކަށް އަންގާފައިވާކަމަށްވެސް ހަބަރުތައް ލިބިފައިވެއެވެ.

މިކަމުގެ ހަގީގަތް އޮޅުންފިލުވުމަށް އަތޮޅު ކައުންސިލްގެ ނައިބު ރައީސް އަހުމަދު ހަލީލްއަށް ގުޅުމުން ވިދާޅުވީ އެފަދަ ކަމެއް ހިނގަމުންދާކަމެއް އެނގިފައި ނެތްކަމަށެވެ.