އެންޓި ޑިފެކްޝަން ގާނޫނާއި އަބުރު ރައްކާތެރިކުރުމާއި ހިޔާލުފާޅުކުރުމުގެ މިނިވަންކަމުގެ ގާނޫނު އުވާލުމަށް ހުށައެޅުމަށް މާދަމާ ރައްޔިތުންގެ މަޖިލީހަށް ހުށައެޅުމަށް ނިންމައިފި އެވެ
އިދިކޮޅު ޕާލަމެންޓް ގުރޫޕުން މިއަދު މި ނިންމުން ނިންމާފައިވާއިރު މި ދެ ގާނޫނަކީވެސް އެތައްބައެއްގެ ފާޑުކިއުންތައް އަމާޒުވި ދެ ގާނޫނެވެ.
ޖީ ގުރޫޕްގެ ފަރާތުން ބޭއްވި ނޫސްވެރިންގެ ބައްދަލުވުމުގައި ރައްޔިތުންގެ މަޖިލީހުގެ މެންބަރުންގެ ގޮނޑި ގެއްލޭ ގޮތަށް ފާސްކޮށްފައިވާ އެންޓި ޑިފެކްޝަން ގާނޫނު އުވާލަން މާދަމާ މައްސަލައެއް މަޖިލީހަށް ވައްދާނެ ކަމަށް ޖުމްހޫރީ ޕާޓީގެ ޑެޕިއުޓީ ޕީޖީ ލީޑަރު އަބްދުﷲ ރިޔާޒު ވަނީ ވިދާޅުވެފަ އެވެ.
އިންތިހާބުވާ ޕާޓީއިން ވަކިވެއްޖެނަމަ ނުވަތަ ވަކިކޮށްފިނަމަ މެންބަރުންގެ ގޮނޑި ގެއްލޭ ގޮތަށް ފާސްކޮށްފައިވާ އެންޓި ޑިފެކްޝަން ގާނޫނަކީ އިދިކޮޅު މެންބަރުން ވަރަށް ބޮޑަށް ދެކޮޅު ހެއްދެވި ގާނޫނެކެވެ. އެ ގާނޫނަށް ޕީޕީއެމްގެ ބައެއް މެންބަރުން ވެސް ދެކޮޅު ހެއްދެވި އެވެ.
މީގެ އިތުރުން އަބުރުގެ ގާނޫނު އުވާލުމަށްވެސް މާދަމާ މަޖީލީހަށް ހުށައެޅުމަށް ނިންމަވާފައިވާއިރު އެ ގާނޫނު އުވާލުމަކީ އިންތިހާބީ ރައީސް އިބްރާހިމް މުހައްމަދު ސޯލިހުގެ ވައުދެކެވެ.
އިދިކޮޅު ޕީޖީ ގުރޫޕުން އެ ދެ މައްސަލަ މަޖިލީހަށް މާދަމާ ވައްދަން ނިންމާފައިމިވަނީ ރައްޔިތުންގެ މަޖިލީހުގެ 12 މެންބަރުންގެ ގޮނޑި ނުގެއްލޭ ކަމަށް އިލެކްޝަން ކޮމިޝަނުން މިއަދު ވަނީ ނިންމާ މަޖިލީހަށް އެކަން އަންގާފަ އެވެ.