ކުޅުދުއްފުށީގައި އެޅުމަށް ހަމަޖެހިފައިވާ ހައުސިން ޔުނިޓްތައް އެޅުމަށް ބޭނުންވާ ބިން ހަވާލުކޮށް މަސައްކަތް ކުރިއަށް ގެންދިއުމަށް ގައުމީ އިދާރާއިން އަންގައިފި

އިބްރާހިމް ހަމީދު

ނޫމަޑި ކޮމްޕެނީގެ ފަރާތުން ކުޅުދުއްފުށީގައި އެޅުމަށް ހަމަޖެހިފައިވާ ހައުސިން ޔުނިޓް އަޅާނެ ބިން މަތިއުތުރު ގައުމީ އިދާރާއިން އެކުންފުންޏާއި ހަވާލުކޮށް މަސައްކަތް ކުރިއަށް ގެންދިއުމަށް އަންގައިފިއެވެ.

ކުޅުދުއްފުށީ އޮންލައިނަށް މަޢުލޫމާތު ދެއްވަމުން މަތިއުތުރު ގައުމީ އިދާރާގެ ސްޓޭޓް ސެކްރެޓަރީ ހަސަން ޒިޔާދު ވިދާޅުވީ ނޫމަޑި ކޮމްޕެނީން ކުޅުދުއްފުށީގައި އެޅުމަށް ހަމަޖެހިފައިވާ ހައުސިން ޔުނިޓްތައް އެޅުމަށް ބޭނުންވާ ބިން އެކުންފުންޏާއި ހަވާލުކޮށްފައިވާ ކަމަށާއި އަދި އެމަސައްކަތް ކުރުމަށް އެކުންފުންޏަށް އަންގާފައިވާނެ ކަމަށެވެ.

މާދަމާގެ ވަގުތެއްގައި އެ ކުންފުންޏަށް މަތިއުތުރު ގައުމީ އިދާރާއިން ދޫކޮށްފައިވާ ބިމުގެ އިން ވަކިކޮށްދިނުމުގެ މަސައްކަތް ރަށު ކައުންސިލުން ކުރައްވާނެ ކަމަށް ޒިޔާދު ވިދާޅުވިއެވެ.

ނޫމަޑި ކޮމްޕެނީގެ ކޮންޓްރެކްޓަރ އައިލެންޑް އެކްސްޕާރޓުގެ އޮޕަރޭޝަން މެނޭޖަރ މުހައްމަދު ޝިނާނު ކުޅުދުއްފުށީ އޮންލައިނަށް މަޢުލޫމަތު ދެއްވަމުން ވިދާޅުވީ ކުޅުދުއްފުށީގައި މިވަގުތު އެޅުމަށް ހަމަޖެހިފައިވަނީ 100 ހައުސިން ޔުނިޓު ކަމަށެވެ. އެހެންނަމަވެސް ސަރުކާރުން އެދޭނަމަ އިތުރު 100 ހައުސިން ޔުނިޓާއެކު ޖުމްލަ 200 ޔުނިޓު އަޅައިދޭނެކަމަށް އެކުންފުނިން މައުލޫމާތު ދެއެވެ.

ހައުސިން ޔުނިޓުގެ މަސައްކަތް ހަވާލުކޮށްފައިވާ ކުންފުނިން މައުލޫމާތު ދޭ ގޮތުގައި މިހާރު އެކުންފުނިން ކުރިއަށް ގެންދަނީ ލޭންޑު އޮބްޒަވޭޝަންގެ މަސައްކަތެވެ. އަދި އަޅަންޖެހޭ ހައުސިން ޔުނިޓްތަކުގެ ކުރެހުންތައް މިހާރު ނިމިފައިވާ ކަމަށާއި ބިން ހަވާލުކުރުމުން މިމަހުގެ ތެރޭގައި ގެ އެޅުމުގެ އަމަލީ މަސައްކަތް ފެށޭނެކަމަށް މައުލޫމާތު ދެއެވެ.

އެންމެ ފުރަތަމަ މަސައްކަތް ފަށާއިރު އެކުންފުނިން ތައްޔާރުވަމުން ދަނީ 3 ކޮޓަރި އެކުލެވޭ 40 ހައުސިން ޔުނިޓު އެޅުމަށެވެ.

“މިހާރުން މިހާރަށް މަސައްކަތް ފެށުމަށް ތައްޔާރުވަމުން ދަނީ 40 ހައުސިން ޔުނިޓް. މިއިން ކޮންމެ ހައުސިން ޔުނިޓަކީ 3 ކޮޓަރީގެ އެޕާރޓްމަންޓެއް” ނޫމަޑި ކޮމްޕެނީގެ އޮޕަރޭޝަން މެނޭޖަރ ވިދާޅުވިއެވެ.

މިކަމާބެހޭ ގޮތުން ކުޅުދުއްފުށީ ރަށު ކައުންސިލްގެ ރައީސް ޖަމްޝީދު މުހައްމަދު ވިދާޅުވީ ނޫމަޑި ކޮމްޕެނީއަށް ކުޅުދުއްފުށީގައި ހައުސިން ޔުނިޓް އެޅުމަށް ދޫކުރައްވާފައިވާ ބިމުގައި އިން ވަކިކޮށްދިނުމަށް މާދަމާ ހަމަޖެހިފައިވާކަމަށެވެ. ކައުންސިލުން މައުލޫމާތު ދޭ ގޮތުގައި އެބިމަކީ ކުޅުދުއްފުށީގެ ހަސަނާތު މިސްކިތުގެ އިރުމަތިން އޮތް ހުސްބިމެވެ.