އަޅުގަނޑަށް ވޯޓްދީގެން މާޔޫސްވާން ޖެހޭނެ އެއްވެސް ރައްޔިތަކު ނުހުންނާނެ: ނަސްރުﷲ

އެ ބޭފުޅާއަށް ވޯޓް ދީގެން މާޔޫސްވާން ޖެހޭނެ އެއްވެސް ރައްޔިތަކުން ނުހުންނާނެކަމަށާއި ލިބިފައިހުރި ހުރިހާ ހުނަރެއް ރައްޔިތުންނަށްޓަކާ ބޭނުންކުރާނެކަމަށް ކުޅުދުއްފުށީ އުތުރު ދާއިރާގެ ޖުމްހޫރީ ޕާޓީގެ ކެންޑިޑޭޓް ނަސްރުﷲ އިސްމާއިލް ވިދާޅުވެއްޖެ އެވެ.

ޕީއެސްއެމް މަޖިލިސް ބަހުސްގައި ވާހަކަދައްކަވަމުން ނަސްރުﷲ ވިދާޅުވީ ރާއްޖޭގެ ބަރުލަމާނީ ހަޔާތުގައި 87 އަހަރުވެގެންގޮސްފައިވާއިރު މަޖިލީހުގައި ވަކާލާތުކުރައްވަން ކުޅުދުއްފުށީ ދަރިޔަކަށް ފުރުސަތު ލިބިފައިނުވާ ކަމަށެވެ. އަދި 18 ވަނަ މަޖިލީހަށް އޭރު އޭނާ ނުކުތީ އެކަންތައް ބަދަލުކުރުމަށް ކަމަށާއި މިއަދު ރަށުގެ ގިނަ ބަޔަކު މަޖިލީހަށް ވާދަކުރާތަން މިފެންނަމުންދަނީ އޭރު އޭނާކުރެއްވި މަސައްކަތުގެ ނަތީޖާއެއްގެ ގޮތުގައި ކަމަށެވެ.

“ރާއްޖޭގެ ބަރުލަމާނީ ހާޔާތުގައި 87 އަހަރުވެއްޖެ ކުޅުދުއްފުށީ ދަރިޔަކު އަދި ކުޅުދުއްފުށީގެ ހައްގުގައި ވަކާލާތުކުރުމަށް މަޖިލީހުގައި ނެތް ތާ. އަޅުގަނޑަށް ވިސްނޭ ސިޔާސީ ބާރުވެރިކަން ރަށުގައި ނެތުމުން ރަށަށް ލިބޭ ނިކަމެތިކަން” ނަސްރުﷲ ވިދާޅުވި އެވެ.

އަތޮޅު ކައުންސިލްގެ ނައިބު ރައީސްކަމުގެ މަގާމުވެސް ފުރުއްވާފައިވާ ނަސްރުﷲ ވިދާޅުވީ ލޯކަލް ކައުންސިލެއްގައި މަސައްކަތްކޮށް އެފަދަ ކައުންސިލެއްގައި ދިމާވާނެ ގޮންޖެހުންތައް އެނގޭ ކަމަށާއި ކައުންސިލްތަކަށް ލިބެން ޖެހޭ ބާރުތައް ހިފަހައްޓާފައިވާކަމަށާއި މިކަންކަން ކުރުމަށްޓަކާ ގާނޫނުތައް އިސްލާހްކޮށް އޭގެ މަންފާ ހަގީގަތުގައިވެސް ރައްޔިތުންނަށް ހޯދައިދޭނެކަމަށެވެ.

ކުޅުދުއްފުއްޓަކީ ރާއްޖޭގައި އޮތް އެންމެ ތަނަވަސް އެންމެ ބިޔަ ސިޓީއަށް ހެދުމުގެ ތަސައްވަރެއް އެބަހުރި ކަމަށާއި އެކަން ކުރުމަށްޓަކާ މަޖިލީހުން ހަދަން ޖެހޭ މުހިންމު ގާނޫނުތަކެއް އެބަހުރި ކަމަށެވެ. އަދި އެ ގާނޫނުތައް މިހާރު ވާނީ ޑްރާފްޓްކޮށް، އެ ތަސައްވުރު ކާމިޔާބުކުރުމަށްޓަކާ މިސަރުކާރުގެ ތެރެއިން މަސައްކަތްކުރެވޭނެ ކަމަށް ނަސްރުﷲ ވިދާޅުވި އެވެ.

ނަސްރުﷲ ވިދާޅުވީ އޭނާ ނުކުމެ ހުރީ ރަށުގައި ހުރި މައްސަލަތަކާއި ގޮންޖެހުންތަކާއި ވާދަކުރުމަށް ކަމަށާއި އެކަން ކަމާ ވާދަކޮށް ކާމިޔާބު ހޯދާނެ ކަމަށެވެ. ރައްޔިތުންގެ ހައްގުގައި ކުރަން ޖެހުން ކޮންމެ ކަމެއްވެސް ކުރާނެ ކަމަށް އޭނާ ވިދާޅުވި އެވެ. ރައްޔިތުންނަށް އުފާ ފާގަތި ދުވަސްތަކެއް ހޯދައިދިނުމުގައި ކުރަން ޖެހޭ ވަރަށް ގިނަ މައްސަލަތައް އެބަހުރި ކަމަށާއި އެކަމަށް ގިނަ ގާނޫނުތަކެއް އިސްލާހުކުރަންޖެހޭ ކަމަށެވެ.

އެގޮތުން ތިމާވެށީގެ ގާނޫނު ފާހަގަކުރައްވަމުން ނަސްރު ވިދާޅުވީ ތިމާވެށި ރައްކާތެރިކޮށް ދަމަހައްޓާކަން ޔަގީންކުރުމުގެ ގޮތުން މިހާރު އޮތް ތިމާވެއްޓާ ބެހޭ މުސްކުޅި ގާނޫނޫ އިސްލާހުކޮށް އެގާނޫނަކީ ދަތް ހުރި ގާނޫނަކަށް ހަދަން ޖެހޭ ކަމަށެވެ. އެހެން ނޫނަމަ ތިމާވެށި ތަރައްގީގެ ނަމުގައި އެއްކޮށް ފަނާކޮށްލަދާނެކަމަށެވެ.

ނަސްރުﷲ ވިދާޅުވީ ފުއްދުންތެރިކަން އިތުރުކުރުމަށްޓަކާ ވަޒީފާއާ ގުޅުން ހުރި ތަމްރީންތައް ދިނުމަށްޓަކާ ކުޅުދުއްފުއްޓާއި ކުޅުދުއްފުށީ ކައިރި ސަރަހައްދުތަކުގައި އިގްތިސޯދީ ހާއްސަ ޒޯންތަކެއް ހަދަން ޖެހޭ ކަމަށެވެ.

ރަށުގައި ބޯހިޔާވަހިކަމާއި ވަޒީފާގެ ފުރުސަތުތައް ނެތުމާއި ކުށްތައް އިތުރުވުމަކީ ރަށުގައި ހުރި ހައްލު ހޯދަން ޖެހޭ މައްސަލަތަކެއްކަން ފާހަގަކުރައްވަމުން އޭނާ ވިދާޅުވީ އެކަންތައްތައް ހައްލުކުރުމަށް ސަރުކާރާއެކު ގުޅިގެން މަސައްކަތްކުރާނެ ކަމަށެވެ.