މަޖިލިސް އިންތިހާބު ކެމްޕެއިން ފޯރިއާއެކު ކުރިއަށްގެންގޮސް ނިންމާލައިފި

ރައްޔިތުން މަޖިލީހުގައި ކުޅުދުއްފުށީން ވާދަކުރައްވާ ކެނޑިޑޭޓުންގެ ކެމްޕެއިން ހަރަކާތް މިއަދު ހަވީރު ފޯރިއާއެކު ނިންމާލައިފިއެވެ.

ކެމްޕެއިން ހަރަކާތް ނިންމާލުމުގެ ގޮތުން ކުޅުދުއްފުށީގެ އެމްޑީޕީ ދެ ދާއިރާއަށް ވާދަކުރައްވާ ދެ ކެންޑިޑޭޓުންވަނީ ވެހިކަލް ބުރެއް ބާއްވާފައިވާއިރު ޕީޕީއެމް ކެނޑިޑޭޓާއި ޖުމްހުރީ ޕާޓީގެ ކެނޑިޑޭޓްވަނީ ލައިވް މިއުޒިކާއެކު ކުޑަކުދީން ހަވީރެއް ބާއްވަފައެވެ.

މަޖިލީހަށް އަމިއްލަގޮތުން ވާދަކުރައްވާ ކެނޑިޑޭޓުންވެސް ވަނީ ކެމްޕެއިން ހަރަކާތްތައް ނިންމާލާފައި ބައެއް ކެނޑިޑޭޓުން ވެހިކަލްގައި ހަރަކާތްތައްވަނީ ކުރިއަށް ގެންގޮސްފައެވެ.

މާދަމާ ރައްޔިތުން މަޖިލީސް އިންތިހާބަށް ވޯޓްލުން ކުޅުދުއްފުށީގެ ދެދާއިރާއަށް ނުވަ ކެންޑިޑޭޓުން ވަނީ ކުރިމަތިލާފައެވެ.

އެގޮތުން ކުޅުއްފުށީ އުތުރުދާއިރާ އެމްޑީޕީ ވާދަކުރައްވާ ކެނޑިޑޭޓަކީ ޔާސިރު އަބްދުއްލަތީފު އަދި ޖޭޕީ އިން ވާދަކުރައްވާ ކެނޑިޑޭޓަކީ ނަސްރުﷲ އިސްމާއީލް އެވެ.

އަދި ދެކުނު ދާއިރާއިން އެމްޑީޕީ ކެނޑިޑޭޓަކީ ޖަމްޝީދު މުހައްމަދު އަދި ޕީޕީއެމް ކެނޑިޑޭޓަކީ އަބްދުއްރަހުމާން އިސްމާއީލް އެވެ. އަމިއްލަ ގޮތުން ދެކުނުދާއިރާއަށް ވާދަކުރައްވާ މިހާރުވެސް މަޖިލީހުގެ އެދާއިރާ ތަމްޝީލުކުރައްވަމުން ގެންދަވާ އަލްއުސްތާޒު މުހައްމަދު ނަޝީދުއާއި އަހްމަދު އާދަމް އާއި އިބްރާހިމް ރަމީޒު އާއި މުހައްމަދު އަބްދުއްރަހީމްގެ އިތުރުން ހުސެއިން އަލީ އެވެ.

އެއްވެސް ކެނޑިޑޭޓަކަށް ތާއިދު ހޯދުމަށް އެއްވެސް ހަރަކާތެއް ވޯޓްލާ ދުވަހުގެ ކުރީ ދުވަހުގެ އިރުއޮއްސި 6 ގެ ފަހުން ކުރިއަށް ނުގެންދެވޭނެކަމަށް އެއީ ގާނޫނީ ގޮތުން މަނާކަމެއްކަމަށް އިލެކްޝަނުންވަނީ ކަނޑައަޅާ އެފަދަ ކަމެއް ހިގައިފިނަމަ ގާނޫނީގޮތުން އަޅަންޖެހޭ ފިޔަވަޅު އެޅިގެންދާނެކަމަށެވެ.