ރާއްޖޭގެ ދެކުނުގަ އޮންނަ ފޯޅަވަހި ކައިރިއަށް ބިންހެލުމެއް އަތުވެއްޖެ

ރާއްޖޭގެ ވެރިރަށް މާލެއާއި 1412 ކިލޯ މީޓަރު ދުރަށް ބިންހެލުމެއް އަތުވެއްޖެއެވެ.

އެ ބިންހެލުން އައިސްފައިވަނީ ރާއްޖޭގެ ދެކުނުން އޮންނަ ފޯޅަވަހި ކައިރީ ކަނޑަށެވެ.

މޫސުމާއި ބެހޭ ގައުމީ އިދާރާއިން ހާމަކުރިގޮތުގައި ފޯޅަވަހި ކައިރިއަށް އައި ބިންހެލުމުގެ އަސަރު ރާއްޖެއަށް ނުކުރާނެ ކަމަށެވެ.

އެ ބިންހެލުން އައިސްފައި ވަނީ އިންޑިއާ ކަނޑުގެ 10 ކިލޯ މީޓަރު އަޑިން ރެކްޓާ މިންގަނޑުން 5.3 މެގްނެޓިއުޑް ބާރު މިނުގައެވެ.

ފޯޅަވައްސަކީ ރާއްޖޭގެ ދެކުނުގައި އޮންނަ އެމެރިކާގެ އަސްކަރީ ބޭސްއެކެވެ.

މިދިޔަ މަހުގެ 24 ވަނަ ދުވަހުވެސް ވަނީ ރާއްޖެ ސަރަހަށްދަށް ބިންހެލުމެއް އައިސްފައެވެ. މި ބިންހެލުން އައިސްފައިވަނީ އައްޑޫ އާއި 608 ކިލޯމީޓަރު ދުރަށެވެ.