އަފީފުއްދީން ސްކޫލުގެ އަހަރީ ދުވަސް ފާހަގަ ކުރުމަށް ގިނަ ހަރަކާތްތަކެއް

ކުޅުދުއްފުށީ، އަފީފުއްދީން ސްކޫލްގެ 15 ވަނަ އަހަރީ ދުވަސް ފާހަގަކުރުމަށް ގިނަ ހަރަކާތްތަކެއް ރޭވިފައިވާކަމަށް އެސްކޫލުން ބުނެފި އެވެ.

އެ ސްކޫލުގައި ރޭވިފައިވާ ހަރަކާތްތަކާ ބެހޭގޮތުން ކޭއޯގައި ވާހަކަ ދައްކަވަމުން އަފީފުއްދީން ސްކޫލްގެ ޕްރިންސިޕަލް ނާސިޙާ އިދުރީސް ވިދާޅުވީ އެހެން އަހަރުތަކާ ހިލާފަށް ސްކޫލުގެ މެނޭޖްމަންޓާއި ޕީޓީއޭ އަދި ބެލެނިވެރީންގެ ފުރިހަމަ އެއްބާރުލުމާއި އެހީތެރިކަމާއެކު ސްކޫލުގެ ފަނަރަ ވަނަ އަހަރީ ދުވަސް ފާހަގަކުރުމުގެ ގޮތުން ގިނަ ހަރަކާތްތަކެއް ރޭވިފައިވާކަމަށެވެ.

" އެގޮތުން ހަރަކާތް ތައް ފެށިގެން ދާނީ ސްކޫލުގެ އަހަރީ ދުވަސްކަމަށްވާ އޭޕްރީލްމަހުގެ ފަންސަވީސްވާ ބުރާސްފަތިދުވަހު ހެނދުނު ސްކޫލުގައި ބާއްވާ ހާއްސަ އެސެމްބުލީއަކާއެކު. މިއެސެމްބުލީގައި ސްކޫލުގެ ގޯތިތެރޭގައި ކެޕްސޫލެއް ވަޅުލުމަށްވެސް ހަމަޖެހިފަވޭ." ނާސިޙާ ވިދާޅުވި އެވެ.

އަދި އެދުވަހުގެ ހަވީރު ބެލެނިވެރިންނާއި ޕީޓޭއިން އިނާމުތަކެއް ކަނޑައެޅިގެން ބާއްވާ މަސްރޭހެއް ކުރިއަށްދާނެ ކަމަށާއި މަސްރޭސް ކުރިއަށްދާނީ ސްކޫލުގެ ހަތަރު ހައުސްގެ ބެލެނިވެރިންގެ މެދުގައި އެކަމަށް ނަންނޯޓްކޮށްފައިވާ ފަރާތްތަކުގެ މެދު ކަމަށެވެ. އެސްކޫލުގެ ހައުސްތަކަކީ ޢާޒީ ހައުސް މަޖީދީ ހައުސް ފަރީދީ ހައުސް އަދި އަމީނީ ހައުސް އެވެ.

ނާސިޙާ ވިދާޅުވީ ސައްބީސްވާ ހުކުރުދުވަހު އޮންނާނީ އަހަރީ ދުވަހާ ގުޅިގެން ބާއްވާ ދުވުމެއް ކަމަށެވެ. ވަނަތަކަށްދާ ބައިވެރިން ހޮވައި މެޑްލް ހަވާލުކުރެވޭނެ އެވެ. ދުވުމުގެ މި އިވެންޓްގައި ބައިވެރިވުމަށް ބިބް ގަނެފައިވާ ފަރާތްތަކަށްބަލާއިރު ރަށާއި ދާއިރާގެ ލެވެލްގެ އިސްބޭފުޅުން ހިމެނެ އެވެ. ދުވުމުގައި އެފަރާތްތަކުން ބައިވެރިވާނެކަމަށް ސްކޫލުން ވަރަށް އުއްމީދު ކުރެ އެވެ.

ހަތާވީސްވާ ހޮނިހިރުދުވަހު ހެނދުނު އޭއީސީގރ މަންދޫބުންނާއި އަފީފުއްދީންގެ މަންދޫބުންގެ މެދުގައި ބާއްވާ ހޭންޑްބޯޅަ މެޗެއް ކުރިއަށްދާނެ އަދި އޭގެ އިތުރުން އެދުވަހުގެ ހަވީރު އަފީފުއްދީން ސްކޫލުގެ ފިރިހެން މުވައްޒަފުންނާއި އަންހެން މުވައްޒަފުންގެ ފިރިންނާއެކު ކުޅެވޭ ފުޓްބޯޅަ މެޗެއް ކުރިއަށްދާނެކަމަށް ނާސިޙާ ވިދާޅުވީ އެވެ.

އަފީފުއްދީން ސްކޫލްގެ އަހަރީދުވަހަކީ ކޮންމެ އަހަރެއްގެ އޭޕްރީލްމަހުގެ ފަންސަވީސް ވަނަދުވަހެވެ. މިއަހަރު ސްކޫލް ހުޅުވިގެން ފަނަރަ އަހަރު ފުރޭއިރު އެ ސްކޫލުގައި 860 ދަރިވަރުން ދަނީ ތައުލީމް ހާސިލްކުރަމުންނެވެ. އެއީ އަންހެން 412 ދަރިވަރުންނާއި 448 ފިރިހެން ދަރިވަރުންނެވެ.